ჯავახეთსა და ქართლს შორის მდებარე საქართველოს ისტორიულ-გეოგრაფიული მხარე თრიალეთი ძველად წალკისა და დმანისის მუნიციპალიტეტების ტერიტორიას მოიცავდა და მესაქონლეობით და მემინდვრეობით იყო განთქმული. აღმოსავლეთ საქართველოს გზების გასაყარზე მდებარე რეგიონი დროთა განმავლობაში, მტრის განუწყვეტელი შემოსევების შედეგად, თითქმის მთლიანად დაცარიელდა, თუმცა მდიდარი ისტორიული მემკვიდრეობა შემოგვინახა: ასზე მეტი ეკლესია და ნანგრევი, ნაციხარნაქალაქარები, მღვიმე-ქვაბები, ლოდოვანი ნამოსახლარები, ქვის მონოლითები. ამიერკავკასიაში პირველი ადამიანიც სწორედ აქ, ისტორიულ თრიალეთში, დმანისის ტერიტორიაზე დასახლებულა. ეს დაახლოებით 1.800.000 წლის წინათ მოხდა. პირველი ევრაზიელი ჰომინიდების თავის ქალები და ყბის ძვლები 1999 და 2001 წელს დმანისის რეგიონში ჩატარებული გათხრების შედეგად აღმოაჩინეს. მეცნიერებმა მას Homo Georgikus-ი შეარქვეს.

 

2013 წელს საქართველოს დაცულ ტერიტორიებს ქვემო ქართლში მდებარე დაშბაშისა და სამშვილდის კანიონები შეემატა. კანიონებს მდინარე ხრამი ქმნის. მისი კალაპოტი გამომუშავებულია ვულკანურ (ბაზალტური ლავის) ქანებში, რომლითაც აგებულია მიმდებარე წალკის პლატო და ხრამის მასივი. ფერდობებზე მრავლადაა მიწისქვეშა წყლების გამოსასვლელები და ჩანჩქერები, ბუნებრივი და ადამიანის მიერ გამოკვეთილი გამოქვაბულები. კანიონი საგანმანათლებლო და სამეცნიერო ტურიზმის საუკეთესო ობიექტია, რადგან კანიონის ფერდობებზე კარგად ჩანს რეგიონის გეოლოგიური განვითარების ისტორია. დაშბაშის კანიონი ზღვის დონიდან 1500 მეტრზე მდებარეობს.