ისტორიული სოფელი უჯარმა მდებარეობს საგარეჯოდან 22 კილომეტრში, მდინარე ივრის ნაპირას. სოფლის ჩრდილოეთით, კლდოვან ქედზე დღემდე შემორჩა III–IV საუკუნეების ციხე-ქალაქის ნაშთები (გალავანი, კოშკები, ტაძარი, სამეფო სასახლე და წყალსაცავი), რომელიც კიდევ უფრო ძველი _ ძვ. წ. II ს-ის ციხის ადგილას აუგიათ. V საუკუნეში აქ დიდი ქართველი მეფის, ვახტანგ გორგასლის რეზიდენცია ყოფილა, სპარსელებთან ბრძოლაში მძიმედ დაჭრილი გვირგვინოსანი აქვე გარდაცვლილა 502 წელს.
უჯარმის უმნიშვნელოვანესი ბუნებრივი რესურსია იოდ-ბრომიანი სამკურნალო წყლები, რომლებიც 1962 წელს გეოლოგებმა ბურღვითი სამუშაოების შედეგად აღმოაჩინეს. კურორტის ბორცვიანი ტერიტორია მდიდარი ფოთლოვანი ტყით არის დაფარული. ადგილის გეოგრაფიული პირობები აყალიბებს მშრალ კონტინენტურ ჰავას, რომელიც, წყლების სამკურნალო ზეგავლენასთან ერთად, საუცხოო ეფექტს იძლევა პერიფერიული ნერვული სისტემისა და გულ-სისხლძარღვთა სისტემის დაავადებების მკურნალობისას. 1963 წლიდან კურორტზე დასასვენებელი სახლი „უჯარმა“ ფუნქციონირებს. კურორტიდან 2 კმ-ში, სოფელ მუხროვანში პატარა მლაშე ტბაა, რომელშიც სამკურნალო ტალახი მოიპოვება.
ცივ-გომბორის ქედის სამხრეთ ფერდობზე კიდევ ორი საკურორტო ადგილია: ცივი კოდა (ზ. დ. 1600 მ), რომლის წიწვოვანი ტყეების არომატით გაჯერებული მთის ჰავა სასარგებლოა სუნთქვის ორგანოების დაავადებებისთვის (მათ შორის, ტუბერკულოზის დახურული ფორმა და არატუბერკულოზური დაავადებები) და გომბორი (ზ. დ. 1165 მ), სადაც ზაფხულის ცხელი თვეების გატარება ძველი დროიდან ჰყვარებიათ გარეკახელებს და კახეთის სტუმრებს. ფოთლოვანი ტყე­ები, მზის სხივების სიჭარბე და საშუალო მთის ქვედა სარტყლის ჰავა დღესაც ბევრ დამსვენებელს იზიდავს. გომბორი რეკომენდებულია ბრონქიტის, ლიმფადენიტის და მეორეული სისხლ­ნაკ­ლებობის სამკურნალოდ.