ხშირად დასმული კითხვები ავტორიზაცია  |  რეგისტრაცია
სიახლეები
ტურიზმის ეროვნული ადმინისტრაცია პორტუგალიიდან მედიის წარმომადგენლებს მასპინძლობს
24 მაისი, 2022

ტურიზმის ეროვნული ადმინისტრაციის ორგანიზებით საქართველოს პორტუგალიიდან ბლოგერები და ფოტოგრაფები ესტუმრნენ.
პრეს-ტური პორტუგალიაში საქართველოს საელჩოს ჩართულობით იმართება. პორტუგალიური მედიის წარმომადგენლები საქართველოს ტურისტული მიმართულების, ქალაქების, კურორტების, კულტურის, გამაჯანსაღებელი და სათავგადასავლო ტურისტული პროდუქტების შესახებ ბლოგებსა და ფოტო რეპორტაჟებს ამზადებენ, რომელსაც სოციალურ ქსელებში გააზიარებენ.

“ჩვენი მიზანია მიზნობრივი ტურისტული ბაზრების მაქსიმალური დივერსიფიკაცია მოვახდინოთ, რომ უფრო მეტი მაღალმხარჯველი ტურისტი მივიღოთ, შემოსავლებშიც აისახოს და უფრო გრძელვადიანი და მდგრადი იყოს ეს შედეგი. შესაბამისად დღეს ჩვენ ვმასპინძლობთ ბლოგერებსა და ჟურნალისტებს პორტუგალიიდან, რომლებიც ძირითადად გაეცნობიან საქართველოს გამაჯანსაღებელ და სათავგადასავლო ტურისტულ პოტენციალს. ეს არის კიდევ ერთი დამატებითი შესაძლებლობა პორტუგალიაში ჩვენი ქვეყნის ტურისტული მიმართულების პოზიციონირება მოვახდინოთ და მივიღოთ მეტი ტურისტი“, -განაცხადა ტურიზმის ეროვნული ადმინისტრაციის ხელმძღვანელის მოვალეობის შემსრულებელმა მედეა ჯანიაშვილმა.

„თავდაპირველად ჩვენ ძველი თბილისი დავათვალიერეთ და ძალიან მომეწონა. საქართველო ძალიან ჰგავს პორტუგალიას, ხალხებს შორიც არის დიდი მსგავსება. ქართველები ძალიან მეგობრულები არიან, ყველა გვიღიმის. ძალიან მომეწონა ქართული ღვინო, რომელიც პორტუგალიურს ჰგავს. ვფიქრობ პორტუგალიელი ტურისტები დაინტერესდებიან საქართველოთი და ეწვევიან თქვენს ქვეყანას“,-ამბობს პორტუგალიელი ჟურნალისტი ლუის დე მაგალჰეისი.
პრეს-ტურის 8 მონაწილე თბილისს, მცხეთას, უფლისციხეს და ქვიშხეთს ეწვია. ბლოგერები და ფოტოგრაფები ბაღდათსა და საირმეს მოინახულებენ, დაათვალიერებენ ვანს, მარტვილს, სოფელს გორდს. ეწვევიან პრომეთეს მღვიმესა და წყალტუბოს.

პრეს-ტურის მიზანია საქართველოს ტურისტული პოტენციალის პოპულარიზაცია პორტუგალიაში და ახალი ტურისტული ნაკადების მოზიდვა.

avianews.ge


© 2011-2017, TRAVEL IN GEORGIA.