ტრადიციული რეწვის დარგების პოპულარიზაციის მიზნით ახალციხეში, რაბათის ციხის ტერიტორიაზე ტრადიციული რეწვის სახელოსნოების პირველი საერთაშორისო ფესტივალი გაიმართება.

ფესტივალის ფარგლებში სახელოსნოებთან მოეწყობა მცირე ზომის სტენდები ტრადიციული რეწვის პროდუქციის გამოფენა-გაყიდვისთვის, სადაც სხვადასხვა დარგის ოსტატები და სახელოსნოები ნაკეთობებთან ერთად წარმოადგენენ ინფორმაციას სახელოსნოების მუშაობისა და შეთავაზებების შესახებ.

ფესტივალი 14-16 სექტემბერს ხალხური და გამოყენებითი ხელოვნების სახელმწიფო მუზეუმისა და ტრადიციული რეწვის ასოციაციის ორგანიზებით და კულტურის სამინისტროსა და USAID Zrda Activity in Georgia -ს დაფინანსებით ჩატარდება. მხარდამჭერია ახალციხის მუნიციპალიტეტის მერია და ივანე ჯავახიშვილის სახელობის სამცხე-ჯავახეთის ისტორიის მუზეუმი. 

ფესტივალი მიზნად ისახავს ასევე ადგილობრივი ოსტატების მხარდაჭერას; სახელოსნოების ინსიტიტუციის აღდგენის ხელშეწყობას; ისტორიული ციხე-სიმაგრის ტერიტორიაზე რეწვის სახელოსნოების მუშაობის პროცესის სანახაობრივი და შემეცნებითი აქტივობების მოწყობით ისტორიული ძეგლის ახალი ფუნქციით დატვირთვა და ვიზიტორების მოზიდვა. 

ფესტივალის ფარგლებში გაიმართება გამოფენა “XIX-XX საუკუნეების ტრადიციული სახელოსნოები საქართველოში“; სახელოსნოების მაკეტები და ფოტომასალა საქართველოს ხალხური და გამოყენებითი ხელოვნების მუზეუმის კოლექციებიდან; ტრადიციული რეწვის სახელოსნოებისა და ოსტატების მუშაობის პროცესის დემონსტრაციები, ღია მასტერკლასები.

ფესტივალზე მონაწილეობენ ადგილობრივი და მოწვეული ოსტატები, და ექსპერტები სხვადასხვა ქვეყნებიდან - თურქეთი, ლატვია, ყაზახეთი, ყირგიზეთი, ტაჯიკეთი, თურქმენეთი, უზბეკეთი.

www.travelingeorgia.ge