აქართველოს კულტურის, სპორტისა და ახალგაზრდობის სამინისტროს ინიციატივითა და მხარდაჭერით, დიმიტრი შევარდნაძის სახელობის ეროვნულ გალერეაში დიდი ქართველი მეფის, ერეკლე მეორისადმი მიძღვნილი გამოფენა „მეფე ერეკლე – საქართველოს უკანასკნელი ლომი“ გაიხსნა, – ინფორმაციას კულტურის სამინისტრო ავრცელებს.

მათივე ცნობით, გამოფენის გახსნას ესწრებოდნენ საქართველოს კულტურის, სპორტისა და ახალგაზრდობის მინისტრი თეა წულუკიანი, შალვა ამირანაშვილის სახელობის ხელოვნების სახელმწიფო მუზეუმის დირექტორი ნიკა ახალბედაშვილი, თბილისის ისტორიის მუზეუმისა და ეთნოგრაფიული მუზეუმის დირექტორი ნინო ჭიპაშვილი, თელავის ისტორიული მუზეუმის დირექტორი გურამ ურჩუხიშვილი და საქართველოს პარლამენტის დეპუტატი მიხეილ სარჯველაძე.

გამოფენის კურატორია ხელოვნების სასახლე – კულტურის ისტორიის მუზეუმის გენერალური დირექტორი, პროფესორი გიორგი კალანდია.

ექსპოზიციაზე ქართველი მონარქის დიდი საქმეების ამსახველი უნიკალური ექსპონატები და როგორც მეფის, ასევე მისი ოჯახის წევრების კუთვნილი ძვირფასი მემორიალური ნივთებია წარმოდგენილი, რომელთა ნაწილს დამთვალიერებელი პირველად იხილავს. მათ შორისაა: მეფე ერეკლეს ბავშვობისდროინდელი სათამაშო, გულსაკიდი ხატი, სათვალე, თოფები (მათ შორის, თოფი მუსაიფი), ხმლები, სამეფო და საკათალიკოსო ტახტები, ერეკლე მეფის პორტრეტები, მეფის ახალუხი (ხალათი), საბეჭდავები, ხელნაწერები, ნაქარგობები და წიგნები. გამოფენაზე დიდი ადგილი ეთმობა ერეკლე მეფის საბრძოლო წარმატებებს. ამ მხრივ, აღსანიშნავია იმ პერიოდის საქართველოში ჩამოსხმული ზარბაზნები, გამოჩენილი ქართველი მხატვრების ტილოები, რომლებიც ასპინძისა და კრწანისის ბრძოლებს მიეძღვნა.

გამოფენაზე საგანგებოდაა ექსპონირებული დედოფალ დარეჯან დადიანის ზურმუხტის საყურეები, თეკლე ბატონიშვილის ოქროსა და ვერცხლის ქამრები და გიორგი XII-ის ნეფრიტის საბეჭდავი.

გამოფენაზე წარმოდგენილია ექსპონატები საქართველოს ხუთი სხვადასხვა მუზეუმიდან. კერძოდ: შალვა ამირანაშვილის სახელობის ხელოვნების მუზეუმიდან, სიმონ ჯანაშიას სახელობის საქართველოს მუზეუმიდან, იოსებ გრიშაშვილის სახელობის თბილისის ისტორიის მუზეუმიდან, ხელოვნების სასახლე – კულტურის ისტორიის მუზეუმიდან, საქართველოს ეროვნული არქივიდან და საქართველოს პარლამენტის ეროვნული ბიბლიოთეკიდან.

დამთვალიერებლებს გამოფენის ნახვა 16 ოქტომბრის ჩათვლით შეეძლებათ. გამოფენის დახურვის დღეს გაიმართება საქართველოს კულტურის, სპორტისა და ახალგაზრდობის სამინისტროს მხარდაჭერით გამოცემული მეფე ერეკლესადმი მიძღვნილი ორენოვანი კატალოგის პრეზენტაცია.

1tv.ge