მედეა ჯანიაშვილმა და ისრაელის ტურიზმის მინისტრის მოადგილემ  ისრაელიდან საქართველოში ტურისტული ნაკადების გაზრდის პერსპექტივა განიხილეს. 

ისრაელში, თელ-ავივში მიმდინარე საერთაშორისო ტურისტული გამოფენის IMTM 2022–ის ფარგლებში, საქართველოს ტურიზმის ეროვნული ადმინისტრაციის ხელმძღვანელის მოვალეობის შემსრულებელი მედეა ჯანიაშვილი ისრაელის ტურიზმის მინისტრის მოადგილეს შეხვდა.

მედეა ჯანიაშვილმა და კობი ბრადამ საქართველოსა და ისრაელს შორის ტურიზმის სფეროში თანამშრომლობის გაღრმავების პერსპექტივებზე ისაუბრეს.

შეხვედრაზე ასავე საუბარი შეეხო კონკრეტულ ტურისტულ პროდუქტებს, რომელსაც საქართველო სთავაზობს ისრაელის ბაზარს და ქვეყნის აქტიური პოზიციონირების მიმართულებით დაგეგმილ ღონისძიებებს.

"საკმაოდ პროდუქტიული და საინტერესო შეხვედრა გვქონდა, სადაც ძირითადად გავაცანით ის ტურისტული პროდუქები,  რომელსაც  ვთავაზობთ ისრაელის ბაზარს.  მოგეხსენებათ, ისრაელი წამყვანი ტურისტული ბაზარია საქართველოსათვის და შესაბამისად განვიხილეთ კონკრეტული გზები, თუ როგორ შეიძლება კიდევ უფრო მეტი ტურისტი მოვიზიდოთ ისრაელიდან" - განაცხადა მედეა ჯანიაშვილმა.

კობი ბრადას თქმით, საქართველო ერთ-ერთი წამყვანი ტურისტული მიმართულებაა ისრაელში, რომელიც ისრაელელებს ძალიან იზიდავთ, უყვართ საქართველო. ისრაელის მოქალაქეებს მოსწონთ ტურისტული თავგადასავლები, ქართული კერძები და სტუმართმოყვარეობა. 

ისრაელი საქართველოსთვის მნიშვნელოვან ტურისტულ ბაზარს წარმოადგენს. ისრაელისა და საქართველოს ქალაქებს შორის რეგულარული ავიარეისები სრულდება, წლების მანძილზე ისრაელი საქართველოს საერთაშორისო ვიზიტორთა ტოპ ათეულში შედის.

business-partner.ge