ტურიზმის ეროვნული ადმინისტრაციის მხარდაჭერით, პირველად საქართველოში, კლასიკური ავტომობილების ავტორბოლა გაიმართება. ღონისძიება ცნობილი ავტომრბოლელი ქალის, ზოე ვითაკერის ინიციატივით დაიგეგმა.

რბოლა მაისშია დაგეგმილი და 4 დღეს გაგრძელდება. ღონისძიების მონაწილეები მოივლიან კახეთისა და სამცხე-ჯავახეთის ისტორიულ ქალაქებს, სოფლებს, ასევე გაეცნობიან ქართულ ტრადიციულ არქიტექტურას.

რბოლა თბილისიდან დაიწყება და თბილისშივე დასრულდება. გარბენის მანძილი დაახლოებით 700 კილომეტრია.

ტურიზმის ეროვნული ადმინისტრაციის ხელმძღვანელი გიორგი ჩოგოვაძე მიიჩნევს, რომ პროექტი ხელს შეუწყობს საქართველოს ცნობადობის გაზრდას და ქვეყნის ტურისტული პოტენციალის წინ წამოწევას.

ღონისძიებასთან დაკავშირებით ტურიზმის ეროვნული ადმინისტრაცია გეგმავს საერთაშორისო მედია ორგანიზაციების წარმომადგენლების ჩამოყვანას.

"საფრანგეთში ერთ-ერთ რბოლაზე იყო ქართველი, რომელმაც ფრანგული ღვინის დაგემოვნებისას მითხრა, რომ ის ღვინო არც ისე კარგი იყო და თუ ვინმეს საუკეთესო ღვინის დაგემოვნება უნდოდა, აუცილებლად უნდა გაესინჯა ქართული ღვინო. ეს ხმამაღალი განაცხადი იყო. მას შემდეგ დრო გავიდა, თუმცა მე სულ მახსოვდა, რომ საქართველო უნდა მენახა, ამის შემდეგ საქართველოში სამჯერ ვიმოგზაურე", - განაცხადა ზოე ვითაკერმა.

ზოე ვითარეკის ცხოვრება კლასიკურ ავტომობილებსა და რბოლებთან არის დაკავშირებული. მას მონაწილეობა აქვს მიღებული ისეთ ცნობილ რბოლებში, როგორიცაა RAC/Chrysler და Alpine Chalange და Paris Tu Marrakesh. საგულისხმოა, რომ მან რამდენიმე წელი იმუშავა და კარიერული წინსვლა დაიწყო "ფორმულა 1"- ში. ზოე მართავდა ბევრისთვის ისეთ საოცნებო ავტომობილებს, როგორიც არის, კლასიკად ქცეული 1957 D-type jaguar და 1996 corvette Stingray, ასევე თანამედროვე Porsche gt4 და lamborgini aventador. ზოეს დაგეგმილი აქვს მსოფლიოს სხვადასხვა ქვეყანაში მსგავსი ტურების მოწყობა. მაისში, საქართველოში დაგეგმილი ავტორბოლა, სწორად ამ ტურის ნაწილი და დასაწყისია, რომელიც მომავალ წელს სამხრეთ ამერიკაში გაიმართება და ჩინეთში დასრულდება. პროექტის ერთ-ერთი ორგანიზატორის, ბრიტანულ-ქართული სავაჭრო პალატის დირექტორის მაკო აბაშიძის განცხადებით, რბოლა ეძღვნება საქართველოს დამოუკიდებლობის 100 წლისთავს.

"ეს არის ძალიან საინტერესო ისტორიული პროექტი. დიდი იმედი გვაქვს, რომ საქართველო გახდება კოლექციონერების და მანქანის მოყვარულების ახალი მიმართულება. დაგეგმილი გვაქვს, რომ პროექტი ყოველწლიურად განხორციელდეს. რბოლა ემთხვევა საქართველოს დამოუკიდებლობის 100 წლის თავს და სწორედ ამ თარიღს ვუძღვნით ჩვენს ღონისძიებას", - განაცხადა მაკო აბაშიძემ.

რბოლის მარშრუტი დაიგეგმა საქართველოს ეროვნული საავტომობილო ფედერაციისა და კომპანია „ტრანსპორტის უსაფრთხოების კონსულტანტების“ მხარდაჭერით. მარშრუტი მოიცავს როგორც ნაკლები სირთულის გზებს, ასევე ციცაბო აღმართებსა და ითვალისწინებს შეჯიბრის ელემენტებსაც.

პროექტის ერთ-ერთი ორგანიზატორია ბრიტანულ-ქართული სავაჭრო პალატა.

www.travelingeorgia.ge