კომპანია „გუდაური ჰელისკის“ დამფუძნებლის ვატო ასათაშვილის შეფასებით, ტურიზმის ეროვნული ადმინისტრაცია არის ორგანიზაცია, რომელსაც აქვს გარკვეული ბიუჯეტი, რასაც სხვადასხვა პროექტებში „ტრანზიტზე ატარებს“. 

ვატო ასათაშვილის აზრით, ვინ იქნება ტურიზმის ადმინისტრაციის ხელმძღვანელი, ამას არსებითი მნიშვნლეობა არ აქვს.  ამის შესახებ მან bm.ge-ის ტურიზმის ადმინისტრაციის ხელმძღვანელის პოსტზე მარიამ ქვრივიშვილის დანიშვნის კომენტირებისას განაცხადა. 

„დღესდღეობით, ვინ იქნება ტურიზმის ადმინისტრაციის ხელმძღვანელი, ამას არსებითი მნიშვნელობა არ აქვს; არ აქვს იქიდან გამომდინარე, რომ ინსტიტუციურად, ტურიზმის ადმინისტრაცია ქმედითი ორგნიზაცია არაა. დიდი ხანია, საუბარი მიდის იმაზე, რომ მას სჭირდება ინსტიტუციონალური რეფორმა. ის უნდა გახდეს უფრო ქმედითი, უფრო აქტიური ორგანიზაცია, რომელიც იმუშავებს მათ შორის რეგულაციების საკითხებზე, მათ შორის ტურიზმის გრძელვადიანი პოლიტიკის საკითხებზეც. 

ჯერჯერობით, რაც მოვისმინეთ <მარიამ ქვრივიშვილისგან> ზუსტად იგივე ნარატივია, რასაც ტურიზმის ადმინისტრაციის ყველა ხელმძღვანელი აკეთებდა. ეს იყო უბრალოდ რაღაც ხედვაზე საუბარი. საბოლოო ჯამში, რას მოიტანს ტურიზმის ადმინისტრაციის ხელმძღვანელობის შეცვლა? – შემიძლია გითხრათ, რომ არაფერს, თუ არ იქნება თვისობრივი ცვლილება თვითონ ტურიზმის პოლიტიკაში. დღესდღეობით, ტურიზმის ადმინისტრაცია არის ორგანიზაცია, რომელიც ბიუჯეტს ღებულობს და შემდეგ ამ ბიუჯეტს ტრანზიტზე ატარებს სხვადასხვა პროექტებში“, – განაცხადა ვატო ასათაშვილმა.