UNESCO-ს ოფიციალურ გამოცემაში „World Heritage” სტატია„საქართველოს კოლხური ტყეები და ჭარბტენიანი ტერიტორიებიUNESCO-ს მსოფლიო ბუნებრივი მემკვიდრეობის ნუსხაში შევიდა”გამოქვეყნდა. საქართველოს უნიკალური ბუნებრივი მემკვიდრეობის შესახებ სტატია 3 ენაზე - ინგლისურად, ფრანგულად და ესპანურად არის ხელმისაწვდომი. სტატიაში საქართველოს 4 დაცული ტერიტორიის, კოლხეთისა და მტირალასეროვნული პარკებისა და კინტრიშისა და ქობულეთის დაცული ტერიტორიების შესახებ ვკითხულობთ. (https://es.calameo.com/read/003329972f1bef553388b)

„კოლხური ტყეები და ჭარბტენიანი ტერიტორიები გამოირჩევა უნიკალური ეკოსისტემებითა და მდიდარი ბიომრავალფეროვნებით. კავკასია, თავის მხრივ, ეკოსისტემების მრავალფეროვნებით, მსოფლიოს 36 ცხელ წერტილს შორისაა. UNESCO-ს მსოფლიო ბუნებრივი მემკვიდრეობის სტატუსის მქონე ტერიტორიები მდებარეობს საქართველოში, აჭარის ავტონომიურ რესპუბლიკაში, გურიასა და სამეგრელო-ზემო სვანეთში. ეს რეგიონები გამორჩეულია უნიკალური ბიომრავალფეროვნებით, მრავალფეროვანი ეკოსისტემებით და გასაოცარი ლანდშაფტებით. აჭარის რეგიონი, თავისი მთიანი კურორტებითა და ფირუზისფერი სანაპიროებით ტურისტებს მთელი მსოფლიოდან იზიდავს, - აღნიშნულია სტატიაში.

აღსანიშნავია, რომ კოლხური ტყეებისა და ჭარბტენიანი ტერიტორიების შესახებ ინფორმაცია,  შესაბამის ფოტომასალასთან ერთად,განთავსდება Google-ის შემეცნებით პლატფორმაზე „Arts and Culture”, რომელსაც წელიწადში 350 000- ზე მეტი ვიზიტორი ჰყავს. აღნიშნული კიდევ უფრო მეტად შეუწყობს ხელს საქართველოს დაცული ტერიტორიების ცნობადობის ზრდას მთელი მსოფლიოს მასშტაბით და, შესაბამისად,  ვიზიტორების დაინტერესებას და მოზიდვას.

2021 წელს, საქართველოს ისტორიაში პირველად, ჩინეთის ქალაქ ფუჟოუში, UNESCO-ს მსოფლიო მემკვიდრეობის კომიტეტის 44-ე სესიაზე მიღებული გადაწყვეტილებით, კოლხეთისა და მტირალას ეროვნული პარკები და კინტრიშისა და ქობულეთის დაცული ტერიტორიები, „კოლხური ტყეებისა და ჭარბტენიანი ტერიტორიების“ სახელით, მსოფლიოს 213 ბუნებრივი მემკვიდრეობის ნუსხას დაემატა და ღირსეული ადგილი მოიპოვა ამაზონის ტყის, გრანდ კანიონის ეროვნული პარკის, იელოუსტოუნის ეროვნული პარკის, მთა ეტნას, შვეიცარიის ალპების გვერდით.

commersant.ge