თბილისიდან დასავლეთით 160 კმ-ის დაშორებით, ხარაგაულის რ-ში ცენტრალური გზიდან მარცხნივ მდებარეობს უბისის სამონასტრო კომპლექსი. იგი შედგება წმ. გიორგის ეკლესიის (დაარსებულია IX ს-ში გრიგოლ ხანძთელის მოწაფეების ქრისტეფორესა და თეოდორეს მიერ), მესვეტის 4-სართულიანი კოშკის (ტაძრის ასომთავრული წარწერა მიუთითებს, რომ აღნიშნული კოშკი ააგო საქართველოს სამეფოს პირველმა ვეზირმა სვიმონ ჭყონდიდელ-მწიგნობართუხუცესმა 1141 წელს), გალავნის ნაშთისა და XVI ს-ის მინაშენისგან.

ტაძარი და კოშკი ნაგებია შირიმის ქვით, სადად არის ორნამენტირებული, კედლებზე გვხვდება სამშენებლო წარწერები. უბისის მთავარი ღირსშესანიშნაობაა XIV საუკუნის ფრესკული მხატვრობა, შესრულებული დამიანეს მიერ. წარმოდგენილია ყველა საუფლო დღესასწაულის ბრწყინვალე კომპოზიცია: ხარება, ბზობა, ჯვარცმა, აღდგომა, ნათლისღება და სხვა. ფრესკებს შორის გამოირჩევა `უბისის წმინდა გიორგის ფრესკა და `საიდუმლო სერობა. ეს მხატვრობა ქართული და ბიზანტიური (პალეოლოგოსთა ეპოქის ხელოვნება) ფერწერის ნაზავს წარმოადგენს.

 

სტატიის ავტორია გამომცემლობა "კლიო"

 

www.klio.ge