სტატია მომზადებულია „ekhokavkaza.com “ -ზე დაყრდნობით. მასში გამოთქმული მოსაზრებები და ტერმინები ეკუთვნის მასალის ავტორს არ გამოხატავს „კომერსანტის“ შეხედულებებს.

აფხაზეთის საზოგადოებრივ პალატაში ტურიზმის განვითარებასთან დაკავშირებით მსჯელობა გაიმართა.

რესპუბლიკის ტურიზმის მინისტრის თეიმაზ ხიშბას თქმით, პანდემიის შემდეგ აფხაზეთში ვიზიტორები სახალი, უფრო შეძლებული კატეგორია გამოჩნდა და ამ ტენდენციას განვითარება სჭირდება.

„ჩვენთან ჩამოსვლა შედარებით მაღალბიუჯეტიანმა და მხარჯველმა ტურისტმა დაიწყო. იმან, რომელიც პანდემიამდე ევროპაში ისვენებდა, დღეს კი, გასაგები მიზეზების გამო, ევროპა დახურულია. ამ კატეგორიაში ასევე ძალიან პოპულარული თურქეთი იყო, თუმცა, იქ ძალიან მძიმე ეპიდემიოლოგიური მდგომარეობაა და რუსეთმა თურქეთთან ავიამიმოსვლა უკვე აკრძალა. შესაბამისად, აფხაზეთს, როგორც ტურისტულ მიმართულებას ამ სეზონზე დიდი პერსპექტივა აქვს“, - თქვა ხიშბამ.

აფხაზეთის ტურიზმის კავშირის თავჯდომარის ანაკალი აგინას თქმით, პანდემია ჯერ არ დასრულებულა, ამიტომაც დამშვიდება ნაადრევია და სასტუმროების მხრიდან აუცილებელია უსაფრთხოების ყველადადგენილი ზომების დაცვა.

„აფხაზეთის ტურისტული სექტორისთვის ყველაზე აქტუალური პრობლემა ამ ეტაპზე ენერგეტიკული კრიზისია. სასტუმრო სექტორი თითქმის მთელი წელი მუშაობს და მათ წყლის საკუთარი მარაგების შექმნადა გენერატორებით ელექტროენერგიის გამომუშავება უწევთ. ცუდი გზები, მოძველებული კომუნიკაციები და ელექტროენერგის მუდმივი გათიშვები, აი პრობლემები, რომლებიც ხელისუფლებამ უნდა გადაწყვიტოს“ - მიიჩნევს ის.

მისი თქმით, პრობლემად ასევე კომუნალური სამსახურების ცუდი მუშაობა რჩება.

„აფხაზეთში საშინელი სიბინძურეა. როგორც კი ტურისტული ავტობუსი რუსეთიდან შემოდის, ეს ძალიან აშკარად ჩანს, ყველგან ნაგავი ყრია. ეს საშინელებაა. ჩვენ ამ საკითხს ყოველწლიურად ვაყენებთ. სეზონი უკვე კარს მოგვადგა, მალე მზე გამოვა და ადამიანები ზღვაზე ჩამოვლენ და რა დახვდებათ მათ პლიაჟზე? იქაურობა ნაგვითაა გავსებული, გარდა ამისა თითქმის არავითარი ინფრასტრუქტურა არ არსებობს, მაგალითად, გასახდელები“, - ამბობს ტურიზმის კავშირის უფროსი.

პარლამენტის დეპუტატის თემურ ფიფიას თქმით, არის კიდევ რამდენიმე პრობლემა, რომელსაც ყოველი ტურისტი პირველივე წუთებიდან ეჯახება.

„პირველი პრობლემაა - საზღვარი. მუდმივად ძალიან დიდი, მრავალსაათიანი რიგებია. ხშირად ტურისტები ვერ უძლებენ და უკან, სოჭში ან ადლერში ბრუნდებიან. ეს პირველი რიგის პრობლემაა - საზღვრის გადაკვეთა. გარდა ამისა, ბევრს საუბრობენ ტურისტების უსაფრთხოებაზე, გაზრდილ კრიმინალზე. მაგრამ ვის ხედავს ტურისტი, რომელიც ჩამოდის აფხაზეთში მანქანით პირველ რიგში? არა ყაჩაღს, რომელიც მას მანქანას ართმევს, არამედ საგზაო ავტოინსპექტორებს, რომელიც მას აჩერებს და ფულს ღიად სძალავს. ჩვენ ხომ ყველამ ვიცით გზებზე რა უბედურება ხდება. ამ დარგში აუცილებელია წესრიგის დამყარება“, - თვლის დეპუტატი.

ამით პრობლემების ჩამონათვალი არ სრულდება.

„ტურისტი ბოლოს და ბოლოს მრავალსაათიან რიგს გაივლის, მილიციისგანაც დააღწევს და ჩამოვა დანიშნულების ადგილას, რას დაინახავს? პირველ რიგში პერსონალის უზრდელობას და უკულტურო ქცევას. ეს ხომ პრობლემაა? როგორ უნდა გადავწყვიტოთ? არ ვიცი. შემდეგ - სანიტარული მდგომარეობა, ოღონდ არა მაინც და მაინც პანდემიასთან დაკავშირებით. სად მიდის კანალიზაცია? ჩვენ ხომ ყველამ ვიცით - სად. პირდაპირ ზღვაში, ამიტომაც ჩვენი ზღვა ძალიან ბინძურია“, - მიიჩნევს დეპუტატი.

თემურ ფიფიას თქმით, პრობლემას ასევე სტუმრების და ადგილობრივი მოსახლეობის კულტურული სხვაობა წარმოადგენს, რაზეც ჩამოსულ ტურისტებს არავინ ესაუბრება. ამის გამო კი ისინი უხერხულ მდგომარეობაში ხშირად აღმოჩნდებიან.

„ხშირად დაინახავთ ნახევრად შიშველ ტურისტებს, რომელიც სუფრაზე მიდიან. მათ არავინ ეუბნებათ, რომ ასეთი საქციელი მიუღებელია. აზიაშიც და ევროპაშიც ტურისტების მიმართ გარკვეული მოთხოვნები არსებობს და არც ერთი ტურისტი გარეთ ნახევრად შიშველი არ გამოვა. ჩვენთან კი ეს დასაშვებია. ეს ტურისტის პატივისცემა კი არაა, ეს ჩვენივე უკულტურობის მაჩვენებელია“, - თვლის თემურ ფიფია.

ekhokavkaza.com 

მოამზადა თენგიზ აბლოთიამ

commersant.ge