„კომერსანტისთვის“ ექსკლუზიურად ცნობილი ხდება, რომ აღმაშენებლის გამზირზე  „აკორის“ ჯგუფში შემავალი წითელი  IBIS-ის ბრენდის 3 და 5  ვარსკვლავიანი სასტუმროები  2019 წლის 1 ივნისამდე  გაიხსნება. ამის შესახებ „კომერსანტს“  პროექტის მფლობელმა კომპანია „ჯორჯიან ჰოტელ მენეჯმენტის“ ხელმძღვანელმა  დავით გელბახიანმა განუცხადა. მისი ინფორმაციით, ორივე სასტუმროს  მშენებლობა/რესტავრაცია დასრულებულია.  ამ დროისთვის  კომპანია თბილისის მერიისგან  შენობის ექსპლუატაციაში მიღებაზე გადაწყვეტილებას ელოდება. 

მისი განცხადებით, IBIS-ის 3 ვარსკვლავიანი  სასტუმრო 150 ნომრიანი იქნება, ნომრების გარდა აქ განთავსდება ყველა საჭირო ინფრასტრუქტურა, რესტორანი, ბარი და სხვა. საინვესტიციო ღირებულება 7 მილიონ  დოლარს შეადგენს.

„ჯორჯიან ჰოტელ მენეჯმენტის“  ხელმძღვანელი აცხადებს, რომ კომპლექსში  შემავალი მეორე სასტუმრო  5 ვარსკვლავიანი და  20 ნომრიანი იქნება. აღნიშნული პროექტის ღირებულება  3  მილიონი დოლარია. მისივე თქმით, ორივე სასტუმრო ოპერირებას HOTEL 1930-ით გააგრძელებს და მისი  მმართველი „ჯორჯიან ჰოტელ მენეჯმენტი“ იქნება . „ეს შენობა 1930 წელს არის აშენებული.“-აცხადებს გელბახიანი.

მისივე განმარტებით, „ჯორჯიან ჰოტელ მენეჯმენტი“ სასტუმროების დეველოპმენტ კომპანიაა, რომელიც უკვე ფლობს ერთ ჰოსტელს ვაკეში. ირკვევა, რომ ამავე კომპანიის პროექტი იყო სასტუმრო „მერკური“ თბილისში.

commersant.ge