აჭარის ტურიზმის დეპარტამენტი შიდა ტურიზმის სტიმულირებაზე ზრუნავს. ამ მიზმით დეპარტამენტმა ახალი პროექტი დაიწყო, რომელიც მიზნად ისახავს საქართველოს რეგიონებში სახელმწიფო უნივერსიტეტის სტუდენტებისა და ლექტორ–მასწავლებლებისთვის რეგიონის ტურისტული პოტენციალის გაცნობას.

აჭარის, როგორც ოთხ სეზონზე დასასვენებელი ტურისტული ადგილის პოპულარიზაცია დღეს თელავის სახელმწიფო უნივერსიტეტიდან დაიწყო: უნივერსიტეტის შესასვლელი აჭარის ტურისტული ღირსშესანიშნაოებების, სამთო-საზღვაო ტურისტული პროდუქტებისა და ტურისტული სერვისების ამსახველი ფოტოებითა და ბანერებით გაფორმდა.

უნივერსიტეტის სტუდენტები ჩაერთნენ სხვადასხვა თემატურ მხიარულ შეჯიბრებაში, რომელთა გამარჯვებულებმაც ბათუმში, ზაფხულის ფესტივალზე დასასწრები სამდღიანი საგზური მოიგეს.

აჭარის ტურიზმის დეპარტამენტის წარმომადგენლებმა სტუდენტებსა და ლექტორ–მასწავლებლებს სპეციალური პრეზენტაცია ჩაუტარეს და გააცნეს რეგიონის ყველა სამთო თუ საზღვაო ტურისტული პროდუქტი. ღონისძიება თელავის სახელმწიფო უნივერსიტეტში ბათუმური ბენდის „ასეა სულ“ კონცერტით დასრულდა.

www.travelingeorgia.ge