TBC Сapital-ის მიერ 15 ივნისს გამოქვეყნებული საქართველოს ტურიზმის ინდუსტრიის ბაზრის მიმოხილვის მიხედვით, მაისში დიდი სასტუმროების დატვირთულობა მნიშვნელოვნად გაიზარდა, მცირე და საშუალო სეგმენტში კი დატვირთვის მაჩვენებელი დაბალ ნიშნულზეა.

„სასტუმროების საშუალო დატვირთულობამ მაისში 22% შეადგინა. იანვრიდან მაჩვენებელი მკვეთრად უმჯობესდებოდა დიდი სასტუმროებისთვის (40% მაისში), რაც ტურისტული ვიზიტების მატებისა და ადგილობრივი დამსვენებლების გააქტიურებასთან ერთად, მათი კონკურენტული უპირატესობითაა განპირობებული. მცირე და საშუალო სასტუმროების დიდი ნაწილი კვლავ დაკეტილია. ამ სეგმენტში დატვირთულობამ მაისში 7% შეადგინა", - აღნიშნულია მიმოხილვაში.

სასტუმროებს დატვირთულობა შეუმცირდათ მესტიაშიც. როგორც სასტუმრო USHBA HILLS-ის დამფუძნებელი ბექა დადეშქელიანი ამბობს, საერთაშორისო ჯავშნები მათთვის არასტაბილურია, რადგან ხშირად ფიქსირდება პრეცედენტები, როცა უცხოელები დაჯავშნილ ნომრებს აუქმებენ. შესაბამისაად, მისი თქმით, ამ ეტაპზე ძირითადი აქცენტი ადგილობრივ ჯავშნებზე კეთდება, რომელიც უფრო სტაბილურია.

ამასთან, დადეშქელიანი ამბობს, რომ წელს მიდგომა სასტუმრეობის მხრიდან სრულიად განსხვავებული უნდა იყოს და მთავარი აქცენტი ბიზნესისგან მარკეტინგულ აქტივობებზე უნდა გაკეთდეს.