„ანაკლია სითი“ პროექტის განვითარების ახალ ეტაპზე გადადის. კომპანია ანაკლიაში სპეციალური ეკონომიკური ზონის (სეზ) განვითარებისთვის, დეტალური სამუშოების მიმართულებით ტენდერებს აცხადებს, კერძოდ, სეზ-ის განაშენიანების რეგულირების გეგმისა და გარემოზე ზემოქმედების შეფასების დოკუმენტის შემუშავებაზე.

ახალ ეტაპს წინ უძღვოდა ეკონომიკურ კვლევასა და ანაკლიის კონცეპტუალურ ქალაქგეგმარებით დოკუმენტზე მუშაობა. კვლევას, რომელზეც იმუშავეს “ანაკლია სითიმ“, ბრიტანულმა კომპანიამ BuroHappold Engineering-მა და კომპანიამ Moffat & Nichol-ი, უახლოეს მომავალში წარადგენენ. კომპანიების საერთაშორისო ექსპერტებმა მოამზადეს: ანაკლიის სპეციალური ეკონომიკური ზონის განხორციელებადობის ეკონომიკური კვლევა, მოთხოვნის ანალიზი და კონცეპტუალური ქალაქგეგმარებითი დოკუმენტი.

„ანაკლია სითის“ ცნობით, გამოცხადებული მიმდინარე ტენდერები მოიცავს: 1. არქიტექტურული და საინჟინრო მომსახურება (ურბანული განვითარებისა და რეგულირების გეგმის და მშენებლობის ნებართვა). 2. ზღვიდან ამოღებული მასალის განთავსების ადგილის და ანაკლიის სპეციალური ეკონომიკური ზონის ტერიტორიის გარემოზე ზემოქმედების შეფასების ანგარიშის მომზადება.

ტენდერები ღიაა და მათთან დაკავშირებული ნებისმიერი ინფორმაციის მიღება შესაძლებელია პლატფორმაზე www.etenders.ge. ტენდერში მონაწილეობის მსურველები აღნიშნულ პლატფორმაზე უნდა დარეგისტრირდნენ.

„ანაკლიის განვითარების კონსორციუმი“ ანაკლიაში ახორციელებს შავი ზღვის ღრმაწყლოვანი ნავსადგურის მშენებლობის პროექტს. ანაკლიის პორტის მიმდებარედ, იგეგმება სპეციალური ეკონომიკური ზონის განვითარება, რომელიც შეასრულებს მნიშვნელოვან როლს ანაკლიის, როგორც რეგიონული ეკონომიკური კვანძის განვითარებაში.

ღრმაწყლოვანი პორტის ტერიტორიაზე, რომლის სამშენებლო ეტაპი 2017 წელს დაიწყო, ამჯერად მასშტაბური საზღვაო სამუშაოები მიმდინარეობს. პორტის ამოქმედება და პირველი გემის მიღება 2020 წელს იგეგმება. ანაკლიის ღრმაწყლოვანი პორტის საკონტეინერო ტერმინალის ოპერატორი ამერიკული კომპანია SSA Marine-ი იქნება.

www.travelingeorgia.ge