ბათუმის ზღვისპირა ბულვარში საზაფხულო სეზონისათვის მზადებაა.

ზღვისპირა ზოლში მორეცხვის გეგმიური სამუშაოები დაიწყო, რომლის ფარგლებშიც პრომინადზე საბაღე სკამები, გალვანიზირებული სანაგვე ურნები, დეკორატიული შადრევნები და მონუმენტები გაიწმინდება.

მორეცხვითი სამუშაოები გეგმიურია და ყოველკვირეულად გაგრძელდება.

ბათუმის ბულვარში სპორტული მოედნების რეაბილიტაცია მიმდინარეობს. არდაგანის ტბასთან არსებულ ე.წ. "ტრანსფორმირებად“ მოედანს უტარდება სამღებრო და აღდგენითი სამუშაოები. გამოიცვლება დაზიანებული მავთულბადეები, ყვითელი და ლურჯი ფერის პლასტმასის სკამები და შეკეთდება ლითონის ღობე.

კეთილმოეწყობა აგრეთვე ფრენბურთისა და ფეხბურთის მოედნები. მიმდინარე სამუშაოები თვის ბოლომდე დასრულდება. სამღებრო სამუშაოები ჩაუტარდა ხიდებზე არსებულ დეკორატიულ ლითონის მოაჯირებს. ძველ ბულვარში კი დაზიანებული ფილების აღდგენა-რეაბილიტაცია ხორციელდება. ამასთანავე, ბულვარის მასშტაბით სრულად წესრიგდება გარე განათების სისტემა. ფეხით მოსიარულეთა ბილიკის გასწვრივ პალმის მინათების (ტერა) და გარე განათების ორფთიან ბოძებზე ელ.კაბელების შეცვლა და დამიწების აღდგენა მიმდინარეობს. სამუშაოებს შპს "მეხამრიდი" ასრულებს.

ბულვარში სხვა ტექნიკური სამუშაოები გრაფიკის მიხედვით განხორციელდება და ზაფხულის ტურისტულ სეზონამდე დასრულდება.

www.travelingeorgia.ge