გარემოს დაცვისა და სოფლის მეურნეობის სამინისტრომ კავკასიის ბუნების ფონდთან (CNF) მემორანდუმი გააფორმა.

მემორანდუმი საქართველოს დაცული ტერიტორიების სისტემის გაფართოების და განვითარების ფინანსურ მხარდაჭერას ითვალისწინებს. დაგეგმილია საქართველოში დაცული ტერიტორიების ფართობის გაზრდა, რაც გულისხმობს რაჭის, სამეგრელო-ზემო სვანეთის, შიდა ქართლისა და გურიის რეგიონებში ხუთი ახალი სივრცის შექმნას. საქართველო კავკასიის ბუნების ფონდისგან, ახლადშექმნილი დაცული ტერიტორიების ფართობის შესაბამისად, 6-10 მლნ აშშ დოლარამდე დახმარებას მიიღებს. მემორანდუმი, დაცული ტერიტორიების მართვის პრაქტიკულ საკითხებთან ერთად, CNF-ის მხრიდან სამართლებრივი ბაზის ჩამოყალიბებაში მხარდაჭერასაც ითვალისწინებს.

„საგრანტო დახმარებას, რომელიც რამდენიმე მილიონ დოლარს შეადგენს, საქართველო კავკასიის ბუნების ფონდისგან WYSS Foundation-ის შემოწირულობის სახით მიიღებს. ამ ფინანსური მხარდაჭერით, ჩვენ შევძლებთ ახალი დაცული ტერიტორიების შექმნას, ინფრასტრუქტურის გაუმჯობესება-განვითარებას და ისეთი პროექტების განხორციელებას, რომელიც, კონსერვაციასთან ერთად, ითვალისწინებს დაბალანსებულ სოციალურ მიდგომებს და ეკონომიკური შესაძლებლობების გაუმჯობესებას ადგილობრივი მოსახლეობისთვის“, - აღნიშნა გარემოს დაცვისა და სოფლის მეურნეობის მინისტრმა ლევან დავითაშვილმა.

როგორც კავკასიის ბუნების ფონდის (CNF) სამეთვალყურეო საბჭოს თავმჯდომარემ, დევიდ მორისონმა განაცხადა, გაფორმებული მემორანდუმით, ქვეყანაში და, ზოგადად, რეგიონში, პირველად შემოდის გარემოსდაცვით სფეროში მოქმედი ერთ-ერთი უმსხვილესი კერძო ამერიკული საქველმოქმედო ფონდი.

"ეს წინ გადადგმული ნაბიჯია, რაც დაეხმარება საქართველოს, ერთი მხრივ, დაცული ტერიტორიების ქსელის გაფართოება-განვითარებაში და, მეორე მხრივ, საერთაშორისო ვალდებულებების შესრულებაში, რაც გაზრდის საქართველოს ცნობადობას საერთაშორისო დონეზე“, - განაცხადა დევიდ მორისონმა.

როგორც CNF-ის აღმასრულებელმა დირექტორმა, თობიას მიუნხმაიერმა აღნიშნა, მნიშვნელოვანია დაცული ტერიტორიების დაცვა, რათა ბიომრავალფეროვნება და გადაშენების საფრთხის წინაშე მყოფი სახეობები შენარჩუნდეს. კავკასიის ბუნების ფონდი, გარემოს დაცვისა და სოფლის მეურნეობის სამინისტროსთან ერთად, შეეცდება 5 ახალი დაცული ტერიტორია განავითაროს და მართოს იმ გზით, რომ კავკასიაში არსებული ველური სახეობები დაცული იყოს საფრთხეებისგან, რაც სტიმული იქნება საქართველოსთვის, კიდევ უფრო გააძლიეროს ბუნების და ბიომრავალფეროვნების დაცვა დღეს, როდესაც მსოფლიო კლიმატის ცვლილებას ებრძვის.

კავკასიის ბუნების ფონდი საქართველოს გარემოს დაცვისა და სოფლის მეურნეობის სამინისტროს დაცული ტერიტორიების სააგენტოსთან 2008 წლიდან თანამშრომლობს როგორც რეინჯერების ფინანსური მხარდაჭერის, ასევე ინფრასტრუქტურის შექმნა-განვითარების კუთხით. კავკასიის ბუნების ფონდის მიზანი დაცული ტერიტორიების მართვის საკითხებში საქართველოს, სომხეთისა და აზერბაიჯანის დახმარება და რეგიონში ბიომრავალფეროვნების შენარჩუნებისა და ეკოსისტემის დაცვის მხარდაჭერაა.

, გარემოს დაცვისა და სოფლის მეურნეობის მინისტრმა, ლევან დავითაშვილმა, კავკასიის ბუნების ფონდის (CNF) სამეთვალყურეო საბჭოს თავმჯდომარემ, დევიდ მორისონმა და CNF-ის აღმასრულებელმა დირექტორმა, თობიას მიუნხმაიერმა მოაწერეს ხელი.

business-partner.ge