საქართველოს ეროვნულ მუზეუმში პირველად გამოიფინება დავით აღმაშენებლის მონეტა, რომელიც ბრიტანეთის მუზეუმში არის დაცული. ეროვნული მუზეუმის განცხადებით, ეს მონეტა დავითის მოჭრილ მონეტებს შორის ყველაზე მნიშვნელოვანია, რადგან მისი წარწერა ასახავს XI-XII საუკუნეების საქართველოს საგარეო პოლიტიკის მთავარ ხაზს.

მონეტის ავერსზე წარმოდგენილია დავით მეფის გამოსახულება ბიზანტიურ სამოსში; თავზე ადგას ჯვრით დამშვენებული გვირგვინი – სტემა, მარჯვენა ხელში გრძელბუნიანი ჯვარი უპყრია, მარცხენაში კი – ჯვრიანი სფერო. გამოსახულების თანმხლები ასომთავრული წარწერა მას მეფე დავითად მოიხსენიებს.

რევერსზე, მონეტის ცენტრში, თანაბარმკლავიანი ჯვრის გამოსახულებაა, რომელსაც გარშემო ქართული ასომთავრული წარწერა გასდევს: „ქრისტე, დავით მეფე აფხაზთა, ქართველთა, რანთა, კახთა, სომეხთა“.

აუდიტორია შეძლებს იხილოს დავით აღმაშენებლის მონეტა როგორც მუზეუმში, ასევე ინტერნეტსივრცეში – სპეციალურად შექმნილ ახალ ციფრულ პლატფორმაზე:

დამთვალიერებელს გამოფენის ნახვა 17 სექტემბრიდან 15 დეკემბრის ჩათვლით შეეძლება.

Commersant.ge