BM.GE-ს ინფორმაციით ანაკლიაში, განმუხურში, მუსიკალური ფესტივალი ECHO WAVES – 2019 სტუმრებს და საერთაშორისო დონის არტისტებს 21-დან 24 აგვისტოს ჩათვლით Check in Georgia-ს ფარგლებში უმასპინძლებს.

BM.GE-სთვის ცნობილი გახდა, რომ ფესტივალს კვლავ Anaklia Entertainment Group გამართავს და ორგანიზატორებმა მუსიკალური ფესტივალის ტერიტორია წინასწარ უკვე მოინახულეს.

ECHO WAVES ფესტივალის გამართვის შესახებ ინფორმაცია BM.GE-ს განათლების, მეცნიერების, კულტურისა და სპორტის სამინისტროშიც დაუდასტურეს, თუმცა უწყებაში კონკრეტული თარიღების დასახელებისგან თავი შეიკავეს და აღნიშნეს, რომ მუსიკალური ფესტივალი აგვისტოს მეორე ნახევარში გაიმართება.

რაც შეეხება იმას, თუ რამდენი მილიონით დაასუბსიდირებს სახელმწიფო ანაკლიაში აღნიშნულ ღონისძიებას, სამინისტროს ინფორმაციით, ეს ამჟამად უცნობია, რადგან მხარეებს შორის ხელშეკრულება ჯერ გაფორმებული არ არის.

შეგახსენებთ, რომ 2018 წელს მუსიკალური ფესტივალი ანაკლიაში 23-დან 26 აგვისტომდე გაიმართა და მასში 150-ზე მეტი არტისტი მონაწილეობდა.

ცნობისთვის: გასულ წელს ღონისძიების ორგანიზებაში Check in Georgia-ს ფინანსური თანამონაწილეობა 4 მილიონ 160 ათას ლარს შეადგენდა, ხოლო 2 მილიონი კერძო ინვესტიციის სახით ჩაიდო.

BM.GE