საქართველოს პრემიერ მინისტრის დავალებით, ვიწყებთ „ენგურჰესზე“ ტურისტული კომპლექსის შექმნის პროექტის განხორციელებას, - ამის შესახებ ეკონომიკისა და მდგრადი განვითარების მინისტრმა ნათია თურნავამ წალენჯიხაში, „ქართული ოცნების“ მერობის კანდიდატის წარდგენის ღონისძიებაზე სიტყვით გამოსვლისას განაცხადა.

მისი თქმით, ჩვენი ქვეყნის უმსხვილესი ჰიდროელექტროსადგური „ენგურჰესი“ მნიშვნელოვანია არა მხოლოდ ენერგეტიკული თვალსაზრისით, არამედ როგორც ტურიზმის მიზიდულობის უნიკალური ადგილი.

„იცით, რომ წლებია ვამუშავებდით „ენგურჰესზე“ ტურისტული კომპლექსის შექმნას, რომელსაც მსოფლიოს სხვადასხვა კუთხიდან ჩამოსული უამრავი ადამიანი მოინახულებს. წელს პრემიერის დავალებით, გადავედით პროექტის უშუალოდ განხორციელებაზე. ენერგეტიკის განვითარების ფონდს მიღებული აქვს დავალება, გამოყოფილია საწყისი ბიუჯეტი და ამ პროექტს მივიყვანთ ბოლომდე. დარწმუნებული ვარ, ეს კიდევ უფრო გააძლიერებს მთლიანად საქართველოს, სამეგრელოს და რა თქმა უნდა, წალენჯიხას“, - აღნიშნა ნათია თურნავამ.

შეგახსენებთ, კულტურული მემკვიდრეობის სააგენტომ ჯერ კიდევ 2017 წელს გაავრცელა ინფორმაცია, რომ “საქართველოს კულტურული მემკვიდრეობის დაცვის ეროვნული სააგენტოს ინიცირებით და სხვადასხვა უწყებებთან თანამშრომლობით, უახლოეს მომავალში, ენგურის კაშხლის მიმდებარედ მუზეუმისა და ვიზიტორთა ცენტრის მოწყობა იგეგმებოდა, თუმცა უკვე მეოთხე წელი გადის და ენგურჰესზე ტურისტული ინფრასტრუქტურის მოწყობა არ დაწყებულა.

bm.ge