"აჭარა ჯგუფი" საგარეჯოში სასტუმრო Rooms-ს ფერმერული კონცეფციით ააშენებს. საქმის კურსთან საუბრისას კომპანიის საზოგადოებასთან ურთიერთობის სამსახურის წარმომადგენელი ოთო ბერიშვილი აცხადებს, რომ პროექტი 2019 წლისთვის დასრულდება. 

სასტუმრო 30-40 ნომრიანი იქნება. ამ ეტაპზე კომპანიას სამშენებლო სამუშაოები არ დაუწყია. 

ოთო ბერიშვილი ამბობს, რომ ამ დროისთვის გადაწყვეტილი მხოლოდ ის არის, რომ სასტუმროში ფერმერული ტიპის მეურნეობა იქნება. 

სოფელ სათაფლეში Rooms-ის სასტუმროს „აჭარა ჯგუფის“ შვილობილი შპს "სითი ლოფტი" ააშენებს. ცნობილია, რომ კომპანია ადგილზე კაკლისა და ნუშის მრავალწლიან ნარგავებს, ხელოვნური ტბორს და საოჯახო ტიპის გასართობ-დასასვენებელი კომპლექსს მოაწყობს. 

ქონების მართვის ეროვნული სააგენტოს ინფორმაციით, სასტუმროს მშენებლობისა და შესაბამისი ინფრასტრუქტურის მოსაწყობად კომპანია 7 000 000 ლარის ინვესტიციას განახორციელებს. 

აჭარა ჯგუფი ამ ეტაპზე ROOMS-ის ორ სასტუმროს ფლობს თბილისსა და ყაზბეგში.

www.bm.ge