ტურიზმის განვითარების ფონდს ახალი დირექტორი ჰყავს.

ამ პოსტზე თბილისის განვითარების ფონდის ყოფილი ხელმძღვანელი გიორგი ბაიდარაშვილი დაინიშნა.

აღნიშნული ინფორმაცია bm.ge-ის საქართველოს თანაინვესტირების ფონდშიც დაუდასტურეს, რომლის ერთ-ერთი დანაყოფია ტურიზმის განვითარების ფონდი.

ცნობისთვის: გიორგი ბაიდარაშვილი სხვადასხვა წლებში მუშაობდა საქართველოს შინაგან საქმეთა სამინისტროში მინისტრის აპარატში სტრატეგიული და ორგანიზაციული მართვის საკითხებში მრჩეველად, დეველოპერულ კომპანია „არსში“ დირექტორის მოადგილედ, PSP ჯგუფში გაყიდვების და ქსელის განვითარების დირექტორად; ასევე იყო საკონსულტაციო კომპანია „სინერჯიში“ კონსულტანტი.

გიორგი ბაიდარაშვილი ბოლო ხუთი წლის განმავლობაში თბილისის განვითარების ფონდის დირექტორი იყო; მან აღნიშნული თანამდებობა მიმდინარე წლის 19 ივნისს დატოვა.

შეგახსენებთ: საქართველოს ტურიზმის განვითარების ფონდი 2014 წლის 3 ნოემბერს დაფუძნდა. კომპანიის იურიდიული მისამართი „ქართუს“ სათაო ოფისში, ჭავჭავაძის 39ა-ში მდებარეობს. მისი დამფუძნებელი და 100%-იანი წილის მფლობელი არის პანამურ ოფშორში რეგისტრირებული კომპანია FRANKSTON INTERNATIONAL-ი, რომელიც ბიძინა ივანიშვილს ეკუთვნის.

2019 წლის პირველ კვარტალში პანამიდან განხორციელებული ინვესტიციის მოცულობა 16.7 მილიონ დოლარს შეადგენს. ამ თანხის უდიდესი ნაწილი სწორედ ტურიზმის განვითარების ფონდზე მოდის.

აღსანიშნავია, რომ 2018 წელსაც $76 მლნ დოლარით, ბიძინა ივანიშვილი საქართველოს უმსხვილესი პანამელი ინვესტორი იყო.