"ჯინო ველნეს გრუპი" ბაკურიანში დასასვენებელ-გამაჯანსაღებელი კომპლექსის მშენებლობას გაზაფხულიდან დაიწყებს. საქმის კურსს კომპანიის წარმომადგენელმა რამაზ მიქაძემ განუცხადა, რომ ამ ეტაპზე საპროექტო სამუშაოები მიმდინარეობს. 

"კონცეფციის საბოლოო ვერსია ამ კვირის ბოლომდე გვექნება",-აცხადებს რამაზ მიქაძე. 

ადგილზე მინიმუმ 4 მილიონ 200 ათასი ლარი უნდა ჩაიდოს. ეს არის ის საინვესტიციო ვალდებულება, რომლის სანაცვლოდაც კომპანიას 500 ათას ლარად მიწა გადაეცა. 

თავდაპირველი პროექტის მიხედვით, ბაკურიანში დაგეგმილია 500 ადამიანზე გათვლილი დასასვენებელი, სპორტულ-გამაჯანსაღებელი, სპა და ველნეს ცენტრის მშენებლობა. პროექტი ითვალისწინებს ასევე აკვა-პარკის, ღია და დახურული ტიპის აუზების, სასტუმროსა და რესტორნების მოწყობას. 

"ჯინო ველნეს გრუპი" ამ ეტაპზე თბილისის ზღვის ტერიტორიაზე მრავალფუნქციურ და გამაჯანსაღებელ კომპლექსს "ჯინო ფერედაისს" ფლობს.

 

ავტორი: სალომე მეცხვარიშვილი

www.bm.ge