„თბილისობა 2018“-ი 6-7 ოქტომბერს გაიმართება. კულტურულ-გასართობი ღონისძიებები თბილისში ორი დღის განმავლობაში გაგრძელდება და დედაენის ბაღში, რიყის პარკში, პირველი რესპუბლიკის მოედანზე, ევროპის მოედანსა და ლეღვთახევში გაიმართება.

მერი გვპირდებვა, რომ თბილისობა ღონისძიებებით საკმაოდ დატვირთული იქნება.

„6 ოქტომბერს ევროპის მოედანზე შედგება „თბილისური ვოდევილის“ პრემიერა, რომელშიც მონაწილეობას მიიღებენ ქართული სცენის ვარსკვლავები ყველა იმ ეთნოსითა და ნიუანსით, რომელიც თბილისს ახასიათებს. სცენაზე მულტიკულტურული თბილისი გაცოცხლდება. „თბილისობის“ დღესასწაულის ერთ-ერთი ყველაზე პოპულარული პროექტი იქნება „გვიდირიჟორე“. სპეციალურად მოწყობილ სცენაზე განთავსებული ორკესტრი მსმენელს პოპულარულ მელოდიებს შესთავაზებს“, - განაცხადა კახა კალაძემ.

7 ოქტომბერს, კონკას მიმდებარე სკვერში, კომპოზიტორ რევაზ ლაღიძის ბიუსტი გაიხსნება და „ქართული ხმების“ კონცერტი გაიმართება. პირველი რესპუბლიკის მოედანზე კი, თბილისის საპატიო მოქალაქეების დაჯილდოება და გრანდიოზული გალა-კონცერტი შედგება, რომელიც ასევე, რევაზ ლაღიძის შემოქმედებას მიეძღვნება.

კონცერტს მუსიკალურად გააფორმებს ევგენი მიქელაძის სახელობის საქართველოს ეროვნული სიმფონიური ორკესტრი ნიკოლოზ რაჭველის ხელმძღვანელობით.

„სცენაზე იდგება ყველა ის მომღერალი, რომელიც სიმღერებს გამოჩენილი ქართველი კომპოზიტორის რეპერტუარიდან ასრულებს. ასევე, რიყის პარკში მოეწყობა ერთ-ერთი ყველაზე დიდი ყვავილების ინსტალაცია, რომლის გარშემოც სხვადასხვა კულინარიული კუთხეები განთავსდება. საზეიმო ღონისძიებების პროგრამა საკმაოდ საინტერესო იქნება. ამიტომ, მივმართავ ყველას, ვისაც გაუხარდება, მოვიდეს, მოიყვანონ შვილები, შვილიშვილები და „თბილისობა“ ერთად ვიზეიმოთ“, - განაცხადა კახა კალაძემ.

მერიის ცნობით, თბილისობის დღესასწაულზე, გარე ვაჭრობა ნებადართულია მხოლოდ სპეციალურად გამოყოფილ ადგილებში:

ჩუღურეთი - ხეთაგუროვის სკვერიდან ბარათაშვილის ხიდამდე

ვაკე - გეგეშიძის ბაღი

გლდანი - ხიზანიშვილის ქუჩა. გლდანის პარკსა და პოლიციის შენობას შორის

სამგორი - ვიქტორ კუპრაძის ქუჩა N10, სვანების ბაზრობის ტერიტორია

დიდუბე - სტანისლავსკის ქუჩა, დიდუბე პლაზას მიმდებარე ტერიტორია დიღმის მასივი, პაიჭაძის ქუჩა N1, სკვერის მიმდებარე ტერიტორია

საბურთალო - სპორტის სასახლის მიმდებარე ტერიტორია

www.travelingeorgia.ge