8 თებერვალს საქართველოში კოვიდის საწინააღმდეგო 3566 აცრა ჩატარდა. მწვანე პასპორტის მოთხოვნის ვალდებულების გაუქმებამდე სამუშაო დღეებში აცრის მაჩვენებელი 8000-8500-ის ფარგლებში მერყეობდა. რეგულაციის მოხსნამ მიმართვიანობა 55%-ით შეამცირა.

მსოფლიოში მოსახლეობის 61.6% მინიმუმ 1 დოზითაა აცრილი, 53.6% ორივე დოზით, საქართველოში შესაბამისად 36.3% და 33.2%. ინფიცირების დადასტურებულ შემთხვევათა რაოდენობამ კი უკვე ერთხელ აცრილებსაც გადააჭარბა და 1.376 მლნ-ს ანუ მოსახლეობის 37.2%-ს მიაღწია, მართალია მათში ბევრია რეინფიცირების და ახლა უკვე მესამედ ინფიცირების შემთხვევებიც, მაგრამ კიდევ უფრო მეტი გამოუვლენელ პაციენტთა რაოდენობაა. ბუსტერ დოზით კი ქვეყანაში სულ 182 ათასი ადამიანი ანუ მოსახლეობის 4.9%-ა აცრილი.

საქართველოში კოვიდვაქცინასთან დაკავშირებით პრობლემები შემოსვლამდე დაიწყო. ქვეყანამ თებერვალში მისაღები ვაქცინის მცირე ოდენობა მარტში მიიღო. ანტივაქსერული განწყობების დასაძლევად არაფერი გაკეთებულა და მცირე ბუმმა, როდესაც დღიურად 20-25 ათასი ადამიანი იცრებოდა, აგვისტოში გადაიარა.

ნამდვილი კოვიდკოშმარიც აგვისტოში დაიწყო, როდესაც ვირუსს 1588 პაციენტი ემსხვერპლა, სექტემბერში 1538, რაც დღიურად ისევ 51 დაღუპულს ნიშნავდა, ოქტომბერში სიტუაციის შედარებით დასტაბილურების შემდეგ მსხვერპლი 1099-მდე შემცირდა, ნოემბერში ახალი რეკორდი მოხსნა და 2009-ს მიაღწია. დეკემბერში 1746 ადამიანი დაიღუპა, 2022 წლის იანვარში კი 1180. სულ, პანდემიის დაწყებიდან დღემდე, ვირუსს საქართველოში 15 300-ზე მეტი ადამიანის სიცოცხლე ემსხვერპლა, მათგან ნახევარი ბოლო 5 თვეში გარდაიცვალა.

ვაქცინა რომ სიკვდილიანობას ამცირებს, არაერთი კვლევით დადასტურდა, ამის მიუხედავად „დარჩი სახლშისგან“ განსხვავებით, რომელმაც ეკონომიკის ვარდნის ხარჯზე მასობრივი ინფიცირების შემთხვევათა რაოდენობა მხოლოდ და მხოლოდ დროში გადაავადა, მთავრობას „აიცერის“ აქტიური კამპანია არ უწარმოებია. უკვე ყოფილი ჯანდაცვის მინისტრი მხოლოდ ერთხელ აიცრა. პრემიერმა კი მწვანე პასპორტები მხოლოდ არჩევნების მეორე ტურის დასრულების შემდეგ დააანონსა.

ორი მწვანე პასპორტის შესახებ პრემიერის გადაწყვეტილებას, რომელიც გადატანილებისთვის უვადო მწვანე სტატუსს გულისხმობდა, თავად ნახევრად ანტივაქსერმა ჯანდაცვის მინისტრმა საჯაროდ დასცინა — უნიკალური ქვეყანა ვიქნებით მსოფლიოშიო. უკმაყოფილება არც ამირან გამყრელიძეს დაუმალავს.

მწვანე პასპორტი დეკემბრიდან, იქამდე კი, 9 ნოემბრიდან, 60 წელს გადაცილებული პირებისთვის 200 ლარიანი წამახალისებელი აქცია დაიწყო, რომელიც იანვარშიც გაგრძელდა, თებერვალში კი ბარიერმა 50 წლამდე დაიწია და იმავე ასაკობრივი კატეგორიისთვის ბუსტერ დოზაზე დამატებით 100 ლარიანი აქციაც ამოქმედდა.

სტატისტიკური მონაცემები აჩვენებს, რომ აქციამ იმუშავა. ვაქცინაციის ყველაზე მაღალი 56%-იანი მაჩვენებელი 70-74 წლების ასაკობრივ ჯგუფში ფიქსირდება, 65-69 წლის ასაკის ადამიანებიდან 54.7%-ა აცრილი, 60-64 წლის ასაკობრივ ჯგუფში - 49.8%, 18-49 წლის ასაკობრივ ჯგუფში კი მხოლოდ 40%.

მდგომარეობა მსგავსია ბუსტერ დოზის შემთხვევაშიც — 65-69 წლის ასაკობრივ ჯგუფში 11.8%-ა აცრილი, 70-74 წლის ასაკობრივ ჯგუფში 14.2%, 18-49 წლის ასაკის ადამიანებში მხოლოდ 3.8%.

ვაქცინის ეფექტიანობას NCDC-ის ანგარიშიც ადასტურებს, რომლის მიხედვითაც კოვიდით გარდაცვლილთა 97%-ზე მეტი აუცრელი იყო. 31 დეკემბრის მდგომარეობით 13 800 გარდაცვლილიდან 13 415 აუცრელი იყო და 385 აცრილი.

ზუსტად რამდენით ამცირებს ვაქცინა გარდაცვალების ალბათობა რთული სათქმელია, ვაქცინის დოზებისა და ვირუსის შტამების ცვლილების გათვალისწინებით მონაცემები იცვლება, მაგრამ ფაქტი ერთია 33%-ის ნაცვლად დღეს მოსახლეობის 73% რომ იყოს აცრილი, სიკვდილიანობა 0-მდე ვერა, მაგრამ მაინც საგრძნობლად შემცირებული იქნებოდა.

მწვანე პასპორტებს ნელ-ნელა ევროპაშიც აუქმებენ, განსხვავება ისაა, რომ იქ მოსახლეობის 70%-ზე მეტია უკვე აცრილი. იმ ფონზე, როდესაც ლეტალობის კოეფიციენტის შემცირების მიუხედავად, ინფიცირებულთა მკვეთრად გაზრდილი რაოდენობის გამო ყოველდღიური სიკვდილიანობა თებერვალში ისევ 50-მდეა გაზრდილი, მწვანე პასპორტის გაუქმების ლოგიკა რთულად ასახსნელია.

ამირან გამყრელიძემ განაცხადა, რომ შიდა დისკუსიას გარეთ არ გამოიტანდა, თუმც კომერციულ სექტორს მწვანე პასპორტის ნებაყოფლობით მოთხოვნისკენ მოუწოდა, რაც მის პოზიციას ნათელს ხდის. მსგავსი განცხადება ექიმმა ბიძინა კულუმბეგოვმაც გააკეთა. გამოდის, რომ გადაწყვეტილების მიღებისას სამედიცინო პერსონალის აზრი არავის გაუთვალისწინებია.

commersant.ge