ქართული ცისფერი ღვინის, კესანეს პირველი პარტია იაპონიაში უკვე გაიგზავნა და გაყიდვებიც კი უახლოეს მომავალში დაიწყება. ამის შესახებ George Grey Winery-ს დამფუძნებელი და კომერციული დირექტორი გიორგი რუხაძე აცხადებს. 

ღვინის კომპანიამ George Grey Winery ცისფერი ღვინო კესანეს წარმოება პანდემიის პერიოდში, მიმდინარე წელს დაიწყო. „კესანეს“ წარმოების იდეა  George Grey Winery-ს ერთ-ერთ პარტნიორს - თათა საურს ეკუთვნის. 

ბიზნესისთვის რთული პერიოდის მიუხედავად George Grey-ს მეღვინეობამ, თეთრი და შავი ყურძნის კომბინაციით ცისფერი ღვინო „კესანე“ მიიღო, რომლითაც ქართული ბაზრის შემდეგ იაპონელები დაინტერესდნენ.

რაც შეეხება, თავად ბრენდს, “კესანე“ ცნობილი ყვავილია, რომელიც  სხვადასხვა ენაზე ითარგმნება როგორც „არ დამივიწყო“, გარდა  ამისა, ყვავილს ცისფერი შეფერილობა აქვს,  პატარა და ნაზია, ეს მახასიათებლები კი  ყველაზე ნაზ ცისფერ ღვინო - „კესანეს“ ძალიან უხდება.

„ამ პროდუქტზე დაახლოებით 1 წელზე მეტი ვმუშაობდით. ჩართულები იყვნენ როგორც ქართველი მეღვინეები, მეღვინე ქიმიკოსები, ასევე საზღვარგარეთიდან მოწვეული სპეციალისტები, შედეგად, მივიღეთ უნიკალური ღვინო, რომელიც თავისი გემოვნური თვისებებით გამორჩეულია.

„კესანე“  არის ტკბილი ღვინო, ალკოჰოლის 16%-იანი შემცველობით, ის შემაგრებული ალკოჰოლური სასმელების კატეგორიაში გადის. მოლოდინი გვქონდა, რომ ბაზარს კარგად არ მიეღო და გვეშინოდა. ზოგადად, სიახლეებს ადამიანები მარტივად არ ხვდებიან და ხანდახან უსაფუძვლოდ კრიტიკის ქარ-ცეცხლში გაატარებენ ხოლმე. მსგავსი ტიპის მოლოდინი გვქონდა. კრიტიკა იყო, ქარ-ცეცხლი - არა. ვინც გასინჯა ყველასგან მოწონება დავიმსახურეთ. „კესანეს“ ადამიანი პირველ რიგში ინტერესის გამო სინჯავს, ხშირად განმეორებითი ყიდულობენ, ეს კი მიუთითებს იმაზე, რომ ღვინო მოეწონათ, შეუყვარდათ,“ - აცხადებს რუხაძე.

მისი ინფორმაცით, ცისფერი ღვინო „კესანეს“ გასაყიდი ფასი 50 ლარამდეა.