საოჯახო, მცირე და საშუალო ინდუსტრიის სესხის პროცენტის სუბსიდირების სახელმწიფო პროგრამის 70 მილიონიანი ბიუჯეტიდან ამ დროისთვის დაფინანსებული ბენეფიციარების სესხებისთვის გადარიცხულია 46,477,445 ლარი

აღნიშნული ინფორმაცია bm.ge-მ პროგრამის განმახორციელებელი სააგენტოდან - „აწარმოე საქართველოში“ გამოითხოვა.
მისივე ინფორმაციით, პროგრამის უნიკალური ბენეფიციარების რაოდენობა 1 554-ია ანუ ჯამში, სესხის პროცენტი 1 554 ბიზნესსუბიექტს/სასტუმროს დაუსუბსიდირდა.

საქმე იმაშია, რომ თუ ბიზნესუბიექტი პროგრამის პირობებს აკმაყოფილებს, მას შეიძლება 2, 3 ან 4 სხვადასხვა სესხის პროცენტი დაუსუბსიდირდეს. შედეგად, დაფინანსებული განაცხადების/სესხების რაოდენობა უნიკალური ბენეფიციარების/სასტუმროების რიცხვს აჭარბებს.

ამასთან, როგორც bm.ge-ის მიერ პროგრამის განმახორციელებელი სააგენტოდან - „აწარმოე საქართველოში“ გამოთხოვილი საჯარო ინფორმაციიდან ირკვევა, მარტიდან მოყოლებული, ჯამში, სესხის პროცენტის სუბსიდირებაზე სულ 8,059 განაცხადი შევიდა. რაც შეეხება ძირითად 3 მიზეზს, რის გამოც განაცხადები დახარვეზდა, ესაა: პირველი - სესხის მიზნობრიობა არ იყო პროგრამისთვის შესაბამისი, მეორე - განმცხადებელი ფიზიკური პირი არ იყო ინდ.მეწარმე და მესამე მიზეზია მრავალჯერ გამოგზავნილი ერთი და იგივე განაცხადი.

www.bm.ge