საქართველოს გაერთიანებული აეროპორტების ხელმძღვანელის გიორგი ჩოგოვაძის თქმით, კახეთში არსებული აეროპორტის „მიმინოს“ გადასვლა საქართველოს აეროპორტების გაერთიანების ბალანსზე თეორიულად შესაძლებელია, თუმცა პრაქტიკულად არა, რადგან მას ჰყავს მფლობელი და ამიტომ ამ აეროპორტის ყიდვა-გაყიდვაზე საუბარი არ მიმდინარეობს, თუმცა სამუშაო შეხვედრების რეჟიმში განიხილება შიდა რეისების სუბსიდირება სახელმწიფოს მხრიდან.

„მომავალში, შესაძლოა, ჩვენი დახმარებით მოხდეს შიდა რეისების, ანუ მაგალითად თელავიდან ბათუმის მიმართულებით ფრენების სუბსიდირება. თუმცა, აეროპორტი დღეს ინფრასტრუქტურულ გაუმჯობესებას საჭიროებს, მათ შორის ასაფრენ დასაფრენი ზოლის მიმართულებით. ეს არის კერძო აეროპორტი, თუმცა კონკრეტული ხედვა მეპატრონისგან, თუ როგორი უნდა იყოს ჩართულობა სახელმწიფოს მხრიდან, ან როგორ უნდა განვითარდეს ის, არ არის განსაზღვრული, ხოლო სამუშაო შევედრები ჯერ კიდევ იმართება“ – აღნიშნა საქართველოს გაერთიანებული აეროპორტების ხელმძღვანელმა.

მისი თქმით, ეს არ არის სახელმწიფოს ბალანზე არსებული აეროპორტი, შესაბამისად, თუ არ მოიძებნება სწორი ფორმა სახელმწიფოს გაუჭირდება თანამშრომლობა.

შეგახსენებთ, რომ უახლოეს მომავალში თელავის აეროპორტი, ჩარტერული რეისების მიღებას გეგმავს. ამის შესახებ bm.ge-ს საავიაციო უნივერსიტეტის რექტორმა სერგო ტეფნაძემ განუცხადა. კახეთის გუბერნატორის ირაკლი ქადაგიშვილის განცხადებით, დათვლილია პროექტის ბიუჯეტიც, რაც შიდა ფრენების შემთხვევაში 9 მილიონი, ხოლო საერთაშორისო მიმართულების განვითარებისთვის 15 მლნ ლარია.