ულამაზესი ჭვანას ხეობა ბათუმიდან 58 კილომეტრში მდებარეობს. ხეობაში მოგზაურობისას ტურისტებს საშუალება აქვთ მოინახულონ ჭვანას ულამაზესი ჩანჩქერი, ხაბელაშვილების თაღოვანი ხიდი და ოთოლთას ციხე. ესტუმრნონ ადგილობრივებს, სადაც ნატურალური ხილის, თაფლისა და ადგილობრივი კერძების დაგემოვნება შეიძლება.

ხეობაში ფუნქციონირებს ფანდურების სახელოსნო, სადაც ფანდურების შეძენის გარდა, მასტერკლასებში მონაწილეობაც შეიძლება.

ჭვანას ტურისტული მარშრუტი ახალია და მისი მარკირება 2019 წლისთვის იგეგმება.

„ეს არის მარტივი სათავგადასავლო მარშრუტი ულამაზეს ხეობაში, რომელიც მდიდარია ციხეებით, მდინარის პირას არსებული საპიკნიკე ადგილებით. აქ ბევრი ისეთი ადგილია, რასაც სხვაგან ვერ ნახავს ჩვენი ტურისტები. მაგალითად, სიმწვანეში ჩაფლული ხის ძველი მუშა წისქვილები და სოფელი, რომელიც წისქვილების სოფლის სახელითაა ცნობილი. ხეობაში მდებარეობს ჭვანას სავიზიტო ბარათი ხაბელაშვილების, 300 წლის ულამაზესი ხის თაღოვანი ხიდი. შემდეგი წლისთვის ჩვენ განვახორციელებთ ამ ულამაზეს ხეობაში ტურისტული მარშრუტის მარკირებას, მასში საოჯახო-სასტუმრო სახლებისა და ტურისტული სერვისების შეტანას,“ - განაცხადა ტურისტული პროდუქტების განვითარების სააგენტოს დირექტორმა თინათინ ზოიძემ.

ჭვანას ხეობაში გამართული ინფოტურის ფარგლებში მონაწილეები, ასევე სტუმრობდნენ ხეობის მუზეუმსა და წისქვილების სოფელს სტუმრობდნენ. ისინი შუახევის ტურიზმის სამსახურის წარმომადგენლებსაც შეხვდნენ და შუახევის ტურისტული პროდუქტების შესახებ პრეზენტაცია მოისმინეს.

აჭარის ტურიზმის დეპარტამენტის ტურისტული პროდუქტების სააგენტომ წელს 4 ინფოტურს გაუწია ორგანიზება. წლის ბოლომდე, სააგენტო ჯამში 10 ინფოტურის ჩატარებას გეგმავს მთიანი აჭარის სხვადასხვა ტურისტული მარშრუტების მიმართულებით.

www.travelingeorgia.ge