შიდა ქართლის ვაკეზე, მტკვრის ორივე მხარეს გაშლილ კასპის მუნიციპალიტეტს ჩრდილოეთიდან ესაზღვრება კავკასიონის სამხრეთი განშტოებები, სამხრეთით — თრიალეთის ქედი. მის ტერიტორიაზე მიედინება მდინარეები: მტკვარი, ქსანი, ლეხურა, კავთურა, თეძამი. თეძმის ხეობაში (სიგრძე 51 კმ) რამდენიმე კურორტი და საკურორტო ადგილია: ახალქალაქის (ზ. დ. 1040 მ) მაღალი მთის ჰავა სასუნთქი გზების დაავადებების პროფილაქტიკისთვის გამოიყენება; გოსტიბე (ზ. დ. 1500 მ) ზოგადი გაჯანსაღებისა და ბრონქული ასთმის სამკურნალოდ არის რეკომენდებული; გარიყულა (ზ. დ. 470 მ) სასარგებლოა სასუნთქი გზებისთვის, რკონი (950 მ) კი _ ბავშვებისა და მოზარდების ზოგადი გაჯანსაღებისთვის. თეძმის ხეობის მარშრუტები, რომლებიც ხეობის რამდენიმე ისტორიულ ძეგლს მოიცავს, დიდი პოპულარობით სარგებლობს საფეხმავლო ტურების მოყვარულთა შორის. მუნიციპალიტეტის კიდევ ერთი საკურორტო ადგილი, სოფელი ხოვლე, უპირველესად თავისი ისტორიული ღირებულებით არის ცნობილი. სოფლის მახლობლად, ხოვლეგორაზე, მეცნიერებმა ძვ. წ. II-I ათასწლეულის ნამოსახლარს მიაკვლიეს. ხოვლე ართროლოგიური პროფილის ბალნეოლოგიური კურორტია, მის ტერიტორიაზე გოგირდიანი მინერალური წყლების რამდენიმე გამოსავალი არსებობს. გასული საუკუნის 80-იან წლებში აქ ადგილობრივი მნიშვნელობის კურორტი ფუნქციონირებდა.

 

1. რკონი. თეძმის ხეობა