კურორტი სტეფანწმინდა

კატეგორიები

ყველა

კახეთი

მცხეთა მთიანეთი

რაჭა-ლეჩხუმი ქვემო სვანეთი

სამეგრელო ზემო სვანეთი

გურია

აჭარა

ოკუპირებული აფხაზეთი

საქართველოს სამხედრო გზა კავკასიონის მთავარი ქედის გავლით (მდ. დარიალის ხეობა) თბილისს ვლადიკავკაზთან აკავშირებს. გზის სიგრძე 208 კმ-ია და ამჟამად ევროპის ავტომაგისტრალ E117-ის ერთ-ერთი მონაკვეთს წარმოადგენს. დარიალის გზა (ასე მოიხსენიებენ მას ბერძენი ისტორიოგრაფი სტრაბონი და რომაელი ბუნებისმეტყველი პლინიუსი ჯერ კიდევ I ს-ში) უხსოვარი დროიდან ყოფილა ცნობილი. ამ გზის საშუალებით ამყარებდა საქართველო ჩრდილოელ მეზობლებთან პოლიტიკურ, ეკონომიკურ და კულტურულ ურთიერთობებს. ამ გზით ჩამოასახლა საქართველოში ყივჩაღები (1118-1120 წწ.) დავით აღმაშენებელმა, ამ გზით მოსულმა „თერგდალეულებმა“ XIX საუკუნის საქართველოს ყოფაში გადატრიალება მოახდინეს. სხვადასხვა დროს საქართველოს სამხედრო გზა პუშკინის, ლერმონტოვის, გრიბოედოვის, მაიაკოვსკის, და სხვა ცნობილი მოღვაწეების შთაგონების წყარო გამხდარა. გზის საქართველოს მონაკვეთის უდიდესი ნაწილი ყაზბეგის მუნიციპალიტეტის ტერიტორიაზე გადის. მისი ადმინისტრაციული ცენტრი, დაბა სტეფანწმინდა, უძველესი ქალაქი და საქართველოს ისტორიულ-გეოგრაფიული მხარის _ ხევის უმთავრესი პუნქტი, მდებარეობს „ხევის პატარძლად“ წოდებული მთა მყინვარწვერის (5033 მ) ძირში. მყინვარწვერი ქართველი ალპინისტებისთვის ტრადიციულად პირველი მნიშვნელოვანი მწვერვალია. მთაზე, გერგეტის მყინვარის მხრიდან, 3680 მეტრ სიმაღლეზე მდებარეობს მეტეოროლოგიური სადგური, სადაც ალპინისტებისთვის თავშესაფარია მოწყობილი. მნახველს აოცებს დაახლ. 4100 მ-ზე, 80-მეტრიანი კლდოვანი კედლის შიგნით ხელოვნურად გამოკვეთილი ბეთლემის გამოქვაბული, რომელიც საუკუნეების მანძილზე სალოცავი და საეკლესიო სიწმინდეებისა და განძის საცავი იყო. მუნიციპალიტეტის ტერიტორიაზე არაერთი მინერალური წყლის საბადო მოიპოვება: მდინარეების - ბიდარის, თრუსოსა და უხათის ხეობებში ბევრ ადგილზე ამოდის ნარზანის ტიპის წყაროები. თავად სტეფანწმინდაც კლიმატურ-ბალნეოლოგიური კურორტია. 1976 წელს ხევის ფლორისა და ფაუნის შენახვისა და გავრცელების მიზნით დაარსდა ყაზბეგის ნაკრძალი. თითქმის უტყეო ნაკრძალი ფაუნის იშვიათი სახეობების - აღმოსავლეთკავკასიური ჯიხვის, არჩვის, ნიამორის, მურა დათვის თავშესაფარია. ნაკრძალის ტერიტორიაზე ბინადრობენ საქართველოს წითელი ნუსხის ფრინველები: ორბი, კავკასიური როჭო, კავკასიური შურთხი, ბატკანძერი, მთის არწივი და სხვ.

1. სტეფანწმინდა და მყინვარწვერი

2. ყაზბეგის მუნიციპალიტეტში, სოფელ ჯუთასთან, ზაფხულობით მოქმედებს ეკოტურისტული ბანაკი `ზეთა~ (2300 მ). ბანაკიდან სამხრეთით ალპინისტებისა და სამთო ტურისტებისთვის საინტერესო ობიექტი - ჭაუხის

მთიანი მასივია. მისი მწვერვალები მაღალი არ არის, მაგრამ ტექნიკურად საკმაოდ რთულად გასავლელია. ზეთადან საფეხმავლო ბილიკები ჩრდილოეთით კიბიშის უღელტეხილით გადადის აღმოსავლეთ კავკასიონის

ულამაზეს ხდის ხეობაში; ბურსაჭირის უღელტეხილის გავლით გუდამაყრის ხეობაში მოხვდებით; სამხრეთაღმოსავლეთით, როშკის უღელტეხილს იქით კი ხევსურეთია.

მდებარეობა: მდ. თერგის ზემო დინების მარჯვენა ნაპირი, დიდი კავკასიონის ცენტრალური ნაწილი, მყინვარწვერის ძირი.

მანძილი: თბილისიდან – 150 კმ.

სიმაღლე ზღვის დონიდან:1880 მ.

რელიეფი: მთაგორიანი.

კლიმატი: საშუალო მთის (ზედა სარტყელი). ზამთარი ცივი, მდგრადი თოვლის საფარით. იანვრის საშუალო

ტემპერატურა -5,20C. ზაფხული გრილი. აგვისტოს საშუალო ტემპერატურა 14,40C.

ნალექების წლიური რაოდენობა: 786 მმ.

ჰაერის საშ. წლიური ფარდობითი ტენიანობა: 72%.

მზის ნათების ხანგრძლივობა წელიწადში: 2232 სთ.

ბუნებრივი სამკურნალო ფაქტორები: საშუალო მთის ზედა სარტყლის ჰავა და ნახშირმჟავა, ქლორიდულ-ჰიდროკარბონატული, კალციუმიანნატრიუმიანი მინერალური წყლები, საერთო მინერალიზაციით 1,5-2 გ/დმ3, მდ. თერგის მარცხენა სანაპიროზე, სტეფანწმინდის ცენტრიდან 2 კმ- ში, დასახლებულ პუნქტ ფანშეტში.

მკურნალობის სახეობები: პასიური კლიმატოთერაპია, მინერალური წყლის მიღება (დალევა).

სამკურნალო ჩვენებები: გულ-სისხლძარღვთა, სუნთქვის, საჭმლის მომნელებელი და ნერვული სისტემების

დაავადებები, რკინადეფიციტური ანემია.

ტექსტი: "საქართველოს 100 კურორტი“

გამომცემლობა "კლიო"

ფოტო გალერეა