1938 წელს აშენდა პირველი ბავშვთა სანატორიუმი, მოსწავლეთა ბანაკი, საბავშვო სახლი, ამბულატორია და ა. შ. 1960-1970 წლებიდან წყნეთი თბილისის პირველხარისხოვანი საგარეუბნო კურორტი გახდა და საკურორტო ზონაში სამთავრობო აგარაკები აშენდა. ზაფხულის პაპანაქება სიცხეშიც კი წყნეთში მუდამ სიგრილეა, რაც უზრუნველყოფს ორგანიზმის მიერ სითბოს გაცემის კომფორტულ პირობებს. სიგრილის მიზეზად არ შეიძლება ჩაითვალოს მარტო განსხვავება სიმაღლის დონეთა შორის. ჰაერის ტემპერატურაზე გარკვეულ გავლენას ახდენს ადგილის იდეალური ვენტილაცია, ადგილობრივი ქარების რეგულარული გამაგრილებელი მოქმედება და მწვანე საბურველი. მრავალწლიანი დაკვირვებები ორგანიზმზე ამ ადგილის ჰავის გავლენის შესახებ მის მაღალ სამკურნალო ღირსებაზე მეტყველებს, განსაკუთრებით, ბავშვთა ასაკის დაავადებების შემთხვევაში. დიდია წყნეთის მნიშვნელობა გამოჯანსაღების პერიოდში მყოფი ავადმყოფებისთვის-რეკონვალესცენტებისთვის. დღეისთვის კურორტის ტერიტორიაზე, ძირითადად, კერძო საცხოვრებელი და სააგარაკო სახლები დგას. ზაფხულობით ფუნქციონირებს ორი სანატორიუმი.