მთის ბალნეო-კლიმატური კურორტი უწერა ზემო რაჭაში, ონიდან 15 კმ-ში მდებარეობს. სოფლის სახელის

წარმოშობა დიდ ქართველ მეფეს, თამარს უკავშირდება: თურმე თამარი თავისი ამალით სამეფოში მოგზაურობდა. რაჭაში ასულს უწერაში შეუვლია და მისი სილამაზით მოხიბლულს უთქვამს: რა აღუწერელი სილამაზეაო. როგორც ამბობენ, `აღუწერელმა~ დროთა განმავლობაში ცვლილება განიცადა და `უწერა~ შემორჩა. სოფელს თავს დაჰყურებს დედაკვინი, იგივე ბროლის მთა, სადაც კრისტალური მთის ბროლის ნატეხები მოიპოვება. უწერაში მიწის ზედაპირზე 28 სახის ბუნებრივი მინერალური წყალი ამოდის. მათ შესახებ ჯერ კიდევ ვახუშტი ბაგრატიონი წერდა თავის ნაშრომში. ერთ-ერთი, გვერითის  სახელით ცნობილი წყარო, XIX ს-ის მიწურულს ძმებმა გამყრელიძეებმა აღმოაჩინეს. წყალმა, რომელიც მათ მამულში ამოდიოდა, ერთ-ერთი ძმა კუჭის მწვავე ტკივილებისგან განკურნა. გამყრელიძეებმა თბილისიდან სამედიცინო კომისია მიიწვიეს. აღმოჩნდა, რომ გვერითის  წყაროს უნიკალური სამკურნალო თვისებები ჰქონდა. 1913-1914 წლებში საფრანგეთის ერთ-ერთი კომერციული საზოგადოება უწერის წყლის ევროპაში ექსპორტით დაინტერესდა და გამყრელიძეებს 45-წლიანი იჯარა შესთავაზა. ძმებმა თანხმობა განაცხადეს იმ პირობით, რომ ადგილობრივი მოსახლეობა წყლით უსასყიდლოდ ისარგებლებდა, რაც ფრანგებისთვის მიუღებელი აღმოჩნდა და შეთანხმება ჩაიშალა. დღეს უწერის მინერალური წყლები გამოიყენება როგორც სასმელად, ისე აბაზანებისთვის. სამკურნალო ეფექტი აქვს კურორტის ულამაზეს წიწვოვან ნაძვნარსა და შერეულ (ნაძვი, სოჭი, მუხა, წიფელი, რცხილა, წაბლი და სხვ.) ტყეებს.

 

უახლოეს მომავალში მთისა და მაღალმთის ბიომების კონსერვაციის მიზნით იგეგმება რაჭა-ლეჩხუმისა და ქვემო სვანეთის გეგმარებითი დაცული ტერიტორიების შექმნა, რომლის სავარაუდო ფართობი 229 532 ჰექტარს იქნება. დაცულ ტერიტორიაში შევა რაჭა-ლეჩხუმისა და ქვემო სვანეთის ეროვნულ პარკი, 12 ბუნების ძეგლი და 4 აღკვეთილი, სადაც კავკასიის, საქართველოს და რეგიონის ენდემური ფლორა და ფაუნა, ასევე საქართველოს წითელ ნუსხაში შეტანილი მცენარეთა და ცხოველთა ათეულობით სახეობაა გავრცელებული. საქართველოში ეს ერთ-ერთი ყველაზე მაღალი ეკოლოგიური ღირებულებისა და ეკოტურიზმის განვითარების პოტენციალის მქონე ადგილია.