სამების ტაძარი ათასწლეულის მიჯნაზე აშენდა სრულიად საქართველოს კათოლი­კოს-პატრიარქის ილია II-ის ინიციატივით და სიმბო­ლურად გამოხატავს ათასწლეულების მიჯნაზე საქარ­თველოს გათავისუფლებასა და ქრისტიანული სარწმუნოების აღორძინებას. ტაძრის პროექტზე კონკურსი 1988 წ. ჩატარდა. მშენებლობა კი 1995 წ. არქიტექტორ არჩილ მინდიაშვილის პროექტით დაიწყო და 2004 წელს დასრულდა.

სამების ტაძარში არის 5 მიწისქვეშა და 4 მიწისზედა ეკლესია. სამების ტაძარი შეიცავს: მთავარანგელოზთა, იოანე ნათლისმცემლის, წმინდა ნინოს, წმინდა გიორგის, წმინდა ნიკოლოზის, 12 მოციქულის და ყოველთა წმინდანთა სახელობის ეკლესიებს.

სამების ტაძარი საქართველოში ყველაზე მაღალი და ფართობით უდიდესი ეკლესიაა. მისი ფართობი 5 ათას მ2-ზე მეტია. იგი აღჭურვილია უახლესი საკომუნიკაციო, ელექტრო, გათბობისა და ვენტილაციის სისტემით. ტაძრის სიმაღლე ჯვრის ძირამდე 86 მეტრია, საკუთრივ ჯვრის სიმაღლე კი 7, 5 მეტრი. ტაძრის მიწისქვეშა ნაწილი ორი სართულისგან შედგება და მიწის ზედაპირიდან 14 მეტრის სიღრმეზეა. ტაძრის არქიტექტურა ძველი ქართული საეკლესიო ხუროთმოძღვრების ჯვარ და ცენტრალურგუმბათოვან სტილთა შერწყმას წარმოადგენს. წმინდა სამების ტაძარი ჯვარში ჩახაზული ტრიკონქია, რვა ბურჯზე დაყრდნობილი გუმბათით. ტაძარში მოხვედრა შესაძლებელია სამი მხრიდან _ დასავლეთ, სამხრეთ და ჩრდილოეთ მკლავებში დატანებული პორტალებიდან. ამათგან, მთავარი კარიბჭე დასავლეთ მკლავშია, რომელსაც გარედან ვრცელი გალერეა აკრავს.

წმ. სამების საკათედრო ტაძრის სამრეკლო სამსართულიანი შენობაა. მისი სიგრძე 20 მეტრია, სიგანე 8 მეტრი, სიმაღლე  29,5 მეტრი.

 

სტატიის ავტორია გამომცემლობა "კლიო" 

 

www.klio.ge