უწერა — სოფელი რაჭა-ლეჩხუმისა და ქვემო სვანეთის მხარეში, ონის მუნიციპალიტეტში, მდ. რიონის ნაპირებზე. შოდა-კედელას ქედის სამხრეთ კალთაზე. თემის ცენტრი (სოფლები: უწერა, ნაკიეთი, ნიგავზები, ფარავნეში, ღარი). ზღვის დონიდან 1050 მ, ონიდან 10 კმ.

უწერა სახელმწიფო მნიშვნელობის საშუალო სიმაღლის მთის კლიმატურ-ბალნეოლოგიური კურორტია. იცის ზომიერად ცივი ზამთარი და ხანგრძლივი თბილი ზაფხული. გამოირჩევა მინერალური წყლების სიმრავლით. სამკურნალო ფაქტორებია მთის ჰავა და მინერალური წყლები. უწერის მინერალურ წყლებს იყენებენ სასმელად, საჭმლის მომნელებელი და საშარდე სისტემის  დაავადებათა სამკურნალოდ. კურორტი მეტად აქტუალურია ზედა სასუნთქი გზების დაავადებათა სამკურნალოდ.

სოფელში ჩამოედინება მდინარე ბეღლორი, რომელიც სათავეს იღებს 2100 მეტრზე და ჩაედინება მდინარე რიონში.

სოფელში შემორჩენილია ფეოდალური ხანის ეკლესიის ნანგრევები. გრანიტით ნაგები წმინდა გიორგის სახელობის მომცრო, დარბაზული ეკლესია. რომლის ორი კედელი რიყის ქვითაა აღდგენილი. სოფლის მახლობლად ფეოდალური ხანის, ჭიდროთასციხისა და სამი ეკლესიის ნანგრევებია.