ახალმა უკრაინულმა დაბალბიუჯეტიანა ავიაკომპანია Bees Airline-მ თბილისისა და ბათუმის მიმართულებით ავიაბილეთების გაყიდვა დაიწყო. ფრენის განხორციელების უფლება ავიაკომპანიამ უკრაინის მარეგულირებლისგან უკვე მიიღო.

კიევი-თბილისი-კიევის მიმართულებაზე Bees Airline ოპერირებას 30 აპრილიდან შეუდგება. საწყის ეტაპზე ავიაკომპანია ოპერირებას კიევსა და თბილისს შორის კვირაში 2 სიხშირით მოახდენს, ხოლო ივნისიდან კი სიხშირეების რაოდენობას 3-მდე გაზრდის. ავიაბილეთების ფასი 50 დოლარიდანაა. 

ავიაკომპანიის სატარიფო პოლიტიკა კი 3 სატარიფო გეგმაზეა გათვლილი, ესენია – LIGHT, SMART და FLEX.

რაც შეეხება კიევი-ბათუმი-კიევის საჰაერო ხაზზე ოპერირებას, Bees Airline ავიაბილეთებს უკვე 9 ივნისის თარიღიდან ყიდის. ბილეთის ფასი (ერთი გზა) 35 დოლარიდანაა.

აღსანიშნავია, რომ Bees Airline-ს ავიაპარკი ამ დროისათვის ორ საჰაერო ხომალდს აერთიანებს. როგორც ცნობილია, უკრაინის სახელმწიფო საავიაციო სამსახურმა სამოქალაქო საჰაერო ხომალდების სახელმწიფო რეესტრში ორი Boeing 737-800 NG შეიტანა, რომლის ოპერირებასაც Bees Airline ახდენს. საჰაერო ხომალდების რეგისტრაციის ნომრებია: UR-UBA (ადრინდელი სარეგისტრაციო ნომერი UR-PSC, ხოლო ექსპლუატანტი FlyUIA) და UR-UBB (ადრინდელი სარეგისტრაციო ნომერი UR-PSD, ხოლო ექსპლუატანტი FlyUIA). ორივე საჰაერო ხომალდის გამოშვების თარიღია 2010 წელი.

Bees Airline-მ ორივე საჰაერო ხომალდი ლიზინგით კომპანია San Сlemente Leasing LLC-სგან მიიღო.

Bees Airline-ს გენერალური დირექტორის განმარტებით, 2021 წლის ბოლომდე Bees Airline-ს ავიაპარკი 4 ერთეულ Boeing 737-ს გააერთიანებს, 2022 წლის ბოლომდე კი ავიაკომპანია 6 საჰაერო ხომალდს გაუწევს ოპერირებას. Bees Airline რეგულარულ ფრენებს ლოუქოსტერ სეგმენტში შეასრულებს, თუმცა იმავდროულად ორიენტირებული იქნება ჩარტერული ფრენების შესრულებაზეც. Bees Airline-ს ბაზირების აეროპორტი კიევი-ჟულიანის საერთაშორისო აეროპორტი (კოდი: IEV) იქნება. 

გავრცელებული ინფორმაციით, Bees Airline-ს მფლობელი ცნობილი უკრაინელი ბიზნესმენი სერგეი სმირნია.

avianews.ge