ლიხის, იგივე სურამის ქედი საქართველოს ორ - დასავლეთ და აღმოსავლეთ ნაწილად ყოფს. აქ გადის ქვეყნის მთავარი ავტომაგისტრალი ს-1, ასევე წიფის სარკინიგზო და რიკოთის საავტომობილო გვირაბები. ქედის სამხრეთ კალთებზე, ხაშურიდან ჩრდილო-დასავლეთით რამდენიმე კილომეტრში მდებარეობს კლიმატურ- ბალნეოლოგიური კურორტი სურამი. სურამი ძვ. წ. II საუკუნეში დაარსებულა. მოხერხებული გეოგრაფიული მდებარეობის წყალობით, ანტიკური ხანიდან მოყოლებული უძველესი სავაჭრო მაგისტრალის -დიდი აბრეშუმის გზის ერთ-ერთი პუნქტი და მნიშვნელოვანი ქალაქი იყო. აქ თავს იყრიდა ქართლიდან, იმერეთიდან და სამცხედან მომავალი საქარავნო გზები. XII-XIII სს-ში სურამი ქართლის ერისთავთა რეზიდენციაა, ხოლო სურამის ციხე - მათი თავდაცითი ბაზა და სტრატეგიული სიმაგრე. XIX საუკუნის ბოლოს (1872 წლიდან) მის ტერიტორიაზე გადიოდაფოთი-თბილისის სარკინიგზო ხაზი, რომელმაც სურამის ქედის ქვეშ სარკინიგზო გვირაბის გაყვანის შემდეგ ფუნქცია დაკარგა. დღეს ის მხოლოდ ადგილობრივი მიმოსვლისთვის გამოიყენება. სურამი საბავშვო პროფილის კურორტია. მის ბუნებრივ სამკურნალო ფაქტორებს წარმოადგენს მშრალი, სუბტროპიკული ჰავა და დაბის ირგვლივ 120 ჰექტარზე გაშლილი ფოთლოვანი ტყე, რომელშიც ხელოვნურად გაშენებული წიწვოვანი მასივებია შერეული. დაბაში მრავლად არის სხვადასხვა სახის მინერალური წყაროებიც. როგორც კურორტი, სურამი სახელს იხვეჭს XIX საუკუნის ბოლოდან. რუსეთ-თურქეთის ომის დროს აქ სამხედრო ჰოსპიტალი ფუნქციონირებდა. მაშინ აღმოაჩინეს, რომ სურამის კლიმატი დადებითად მოქმედებდა მალარიით დაავადებულ პაციენტებზე. თანდათან სურამი პოპულარული სააგარაკო ადგილი გახდა. 1938 წელს სურამში გაიხსნა ბავშვთა სახლი, სადაც მეორე მსოფლიო ომის წლებში ობლად დარჩენილი 300-400 ბავშვი ცხოვრობდა. 1948 წელს ადგილობრივი მნიშვნელობის კურორტის სტატუსი მიენიჭა, სადაც ფუნქციონირებდა რამდენიმე სანატორიუმი და დასასვენებლი სახლი.