აჯამეთის აღკვეთილი დასავლეთ საქართველოში, კოლხეთის დაბლობის აღმოსავლეთ დაბოლოებაზე, თბილისიდან 265 კმ-ზე მდებარეობს. იგი შეიქმნა იმავე სახელწოდების ნაკრძალის საფუძველზე, რომელიც 1946 წლიდან ფუნქციონირებდა. 

აღკვეთილის ტერიტორია, რომლის ფართობი 5 კმ2-ს აღწევს, თითქმის მთლიანადაა დაფარული პოლიდომინანტური, უძველესი კოლხური ტყეებით. ტყის მცენარეულობიდან ფართოდაა გავრცელებული მუხა, რცხილა, ჯაგრცხილა, ნეკერჩხალი, თელა, ლაფანი, კაკალი და სხვ. ქვეტყეში ვხვდე­ბით მარადმწვანე შქერს, პასტუხოვის სუროს, ზღმარტლს, ას­კილს და სხვ. აქ დაცულია ისეთი რე­ლიქტური სა­ხეობები, როგორიცაა იმერეთის მუხა (უერცუს იმერეტინა) და ძელქვა (ძელცივა ცარპინიფოლია). ცალკეული ხემცენარეების ასაკი რამდენიმე ასწლეულს აღწევს. 

აჯამეთის აღკვეთილის ცხოველთა სამყარო შედარებით ღარიბია, თუმცა გვხვდება საქართველოს წითელ წიგნში შეყვანილი სახეობებიც: მცირე მეღამურა, კავკასიური ციყვი, ძილგუდა, ღნავი და კავკასიური წავი.

აჯამეთის აღკვეთილის მიმდებარე ტერიტორიებზე არაერთი დიდი მნიშვნელობის ძეგლია. მათ შორისაა დაბა ვარციხე (აშენებულია ანტიკური ქალაქის როდოპოლისის ნანგრევებზე), გეგუთი (XI საუკუნის სანადირო სასახლის ნანგრევები), ქალაქი ქუთაისი და სხვ. 

 

სტატიის ავტორია გამომცემლობა "კლიო"

 

www.klio.ge