გოდერძის განამარხებული ფლორა

 

გოდერძის განამარხებული ფლორა გოდერძის უღელტეხილის (ზღვის დონიდან 2025 მეტრი) სიახ­ლოვესაა წარმოდგენილი. იგი საქართველოს სამ­ხრეთ-დასავლეთ ნაწილში, არსიანის მერიდიანული მიმართულების ქედზე მდებარეობს. 

ქედის გეოლოგიური ისტორია წყალქვეშა ვულკანიზმს უკავშირდება, რის გამოც იგი„ გოდერძის წყლების“ სახელით ცნობილი ვულკანოგენური ქანებითაა აგებული. მის აღმოსავლეთ ნაწილშია აღმოჩენილია მესამეულის განამარხებული ფლორის ფრაგმენტები, რაც მსოფლიო მნიშვნელობის ბუნების უნიკალური ძეგლია. 

განამარხებული ფლორა რამდენიმე მილიონი წლის წინანდელ ვულკანიზმს უკავშირდება. ვულკა­ნურმა ფერფლმა და ლავამ გადაფარა მძლავრი ტროპიკული ტყე, რომელშიც ათეულობით სახეობის ხემცენარე იყო წარმოდგენილი. ტროპიკული ტყის ბედს პომპეისას ადარებენ. აქ წარმოდგენილია ქვედაპლიოცენური ასაკის მცენარეების (პალმა, მაგნოლია, დაფნა, არყი, რცხილა, წიფლისებრნი და სხვ.) ნაშთები, გაქვავებული და ნახევრად გაქვავებული ხეების, აგრეთვე ფოთლების ანაბეჭდების სახით.

გოდერძის განამარხებული ფლორა პალეოგეოგ­რაფიისა და მცენარეთა ევოლუციის საუკეთესო ნიმუ­ში აღმოჩნდა. მისი მეშვეობით დადგინდა, რომ იმ პერიოდში კავკასიის ტერიტორიაზე ნოტიო ტროპიკული სარტყლისთვის დამახასიათებელი ჰავა და მცენარეულობა დომინირებდა. ტყეებში გვხვდებო­და როგორც მარადმწვანე, ისე ფოთოლმცვივანი სა­ხეობები, ბუჩქნარები და ლიანები, გვიმრისნაირები და ბალახოვნები. ამჟამად ამგვარი ტყეები იაპონიაში, ავს­ტრალიასა და სამხრეთ ამერიკაშია გავრცელებული.

 

ავტორი: გამომცემლობა "კლიო"