მდებარეობს მდინარე ძირულას ხეობაში, მდინარის ორივე მხარეს. ჩრდილოეთით ესაზღვრება სოფელი კორბოული. სამხრეთით _ სოფელი ღოდორა. ჩრდილო-დასავლეთით _ ჭიათურის მუნიციპალიტეტის ტერიტორია სოფელ ზედა ბერეთისის სანახებით. აღმოსავლეთით ესაზღვრება სოფელი ჭალოვანი.

სოფლის ყველაზე დაბალი ადგილია სოფლის სამხრეთ ნაწილში, მდინარე ძირულას ხეობაში, სიმაღლე ზ.დ. 690 მეტრი, ხოლო მაქსიმალური ადგილია, უკიდურესი სამხრეთ ნაწილში, სოფლის ტყის ტერიტორიაზე ზ.დ. 850 მეტრი. სოფლის ცენტრის სიმაღლე ზ. დ. 740 მეტრია.

სოფელი ლიჩი დასავლეთიდან აღმოსავლეთისაკენ ვრცელდება მდინარე ძირულას ხეობის გაყოლებით საშუალოდ 3 კმ-ზე, ხოლო, ჩრდილოეთიდან სამხრეთისაკენ დაახლოებით 4 კმ-ზე.

სოფელი ლიჩი შედის ჭალოვნის თემში,  მანძილი  ცენტრამდე 3 კმ-ია, ხოლო მანძილი ლიჩიდან ქალაქ საჩხერემდე 37 კილო-მეტრია, მოსახლეობის რაოდენობა 2007 წლისათვის შეადგენდა 85 კომლი 250 სული მცხოვრებით. 2002 წლის აღწერის მონაცემებით კი 256 მაცხოვრებელი იყო, აქედან 113 იყო კაცი, ხოლო 143 მაცხოვრებელი იყო ქალი.

გავრცელებული გვარებია: ხარაიშვილი, ტაბატაძე, ლომიძე, მაჭარაშვილი, გაგნიძე, ტეფნაძე, ნოზაძე. სოფლის მეურნეობის ძირითადი დარგებია: მესიმინდეობა, მეცხოველეობა, მეფუტკრეობა. სოფლის ტერიტორიაზე გაედინება მდინარე ძირულა. სოფელში ფუნქციონირებს ლიჩის საჯარო სკოლა (1-9), დირექციის წევრთა რაოდენობა 2, მასწავლებლების რაოდენობა 15, დამხმარე პერსონალის რაოდენობა 3, კლასების რაოდენობა 9, მოსწავლეთა რაოდენობა 57.

სოფლის ტერიტორიაზე არის ისტორიული ძეგლები, რომელთა შორის აღსანიშნავია ნაეკლესიარი საკვირაოსი (ნასოფლარი ქვემო ლიჩი), რომელიც თარიღდება XIX  საუკუნით.

ავტორი: გიორგი დვალაშვილი

ყველა უფლება დაცულია