სოფელი ორღული აერთიანებს ორ დასახლებულ პუნქტს ზედა და ქვედა ორღულს. ორღული მდებარეობს მდინარე ყვირილის მარჯვენა მხარეს. ჩრდილოეთით ესაზღვრება ტყის ზოლითჱსაჯალყელოს მთა. სამხრეთით მდინარე ყვირილის ხეობა და სოფელი სავანე სახნავ_სათესი სავარგულებით. დასავლეთით - სოფელი ჩიხა, ჩ_დ. ნაწილში, ზ.დ. 850_900 მ., ხოლო სამხრეთ_დასავლეთ ნაწილში 480_500 მ. აღმოსავლეთით - ჭალის თემის  სოფელი ღონა. სოფელი ორღული დასავლეთიდან აღმოსავლეთისაკენ გადაჭიმულია დაახლოებით 3 კმ_ზე, ხოლო ჩრდილოეთიდან სამხრეთისაკენ (ტყის ზოლისა და მდინარეული ხეობის ჩათვლით) 4_4,5 კმ-ზე.

სოფლის ყველაზე დაბალი ადგილია უკიდურეს ს_დ. ნაწილში, მდინარე ყვირილის ჭალაში ზ. დ. 470 მეტრი, ხოლო უმაღლესი წერტილია _ მთა საჯალყელო 1195 მეტრი ზ.დ. სოფელი ორღულის ცენტრის სიმაღლე ზ.დ. 505 მეტრია.

სოფლისდდღევანდელ ტერიტორიაზე ცხოვრობდნენ ბატონების ურჩი ანუ ,,ორგული~ გლეხები. დასახლებაც ასე იხსენიებდა, დროთა განმავლობაში სიტყვა ,,ორგული~ გადაკეთდა ან გადააკეთეს ,,ორღულად~ და ამგვარად მოიხსენიება დღეისათვის.

დღევანდელი სოფელი ორღული 90_იან წლებამდე ორად იყო გაყოფილი: ზედა და ქვედა ორღულად. შემდეგ მოხდა სოფლების გაერთიანება და დღეისათვის მოიხსენიება ორღულად. სოფელი შედის ჩიხის თემში, მანძილი საკრებულოს ცენტრამდე 2 კმ.-ია, ხოლო ქალაქ საჩხერემდე მანძილი 7 კმ.-ია. სოფლის ფართობი 844 ჰექტარია, დღეისათვის სოფელში ცხოვრობს 430 კომლი და 1217 სული. გავრცელებული გვარებია: ჭიღლაძე, მაჭავარიანი, კალმახელიძე, ფოფხაძე, კესარელი, ძინძიბაძე, ხვედელიძე, ნადირაძე, მწყერაშვილი.

ძირითადი საქმიანობა მიწათმოქმედება და მესაქონლეობაა. ორღულის ტერიტორიაზე მწყერაშვილების უბანშია ორღულის წმინდა გიორგის სახელობის, შუა საუკუნეში აგებული ეკლესია, ეს ეკლესია ადრე დანგრეული ყოფილა, შემდეგ კი აღუდგენიათ, ამას მოწმობს ეკლესიის აღმოსავლეთ ნაწილში უკუღმა დაწყობილი ქვები, ლაპი-დარული წარწერით.

ორღულის გეოგრაფიული  ადგილების სახელწოდებებია: ვაკე ტყე, ქართველაკარები, დიდყანები, ვალისახო, დიდახო, ხოსიარის ტყე, აკოფები, გობინასმინდორი, ენდრონიკა, ბენიძგვები, ცოფიანებისუბანი, საბადურები, აბანოები _ სახსრების, ანთების სამკურნალო დანიშნულების მქონე, მდებარეობს სოფლის ჩრდილო-აღმოსავლეთ ნაწილში.

სოფლის წყაროებია: ბენიძგვების წყალი, რაჭის გობინა. მთავარი მდინარეა ყვირილა, მას სოფლის ტერიტორიაზე მარჯვნიდან უერთდებიან: ლესერა, გაკოდილა, გოგიას ღელე.

ავტორი: გიორგი დვალაშვილი

ყველა უფლება დაცულია