შილდის ციხე - შილდა ყვარლის რაიონის დიდი სოფელია და ქ.  ყვარლიდან 15 კმ-ში მდებარეობს. მის ტერიტორიაზე მრავალი არქიტექტურული ძეგლია შემორჩენილი, მათგან გამოირჩევა ციხე-გალავანი

`გალავანი” აუგიათ მდინარე ჩელთის მარცხენა ნაპირზე. ციხე ძლიერ დაზიანებულია, ციხის შიგნით საბავშვო ბაღია აშენებული. ციხის კუთხეებში ცილინდრული კოშკები მდგარა. სამხრეთისა და დასავლეთის კედლების ცენტრებში კი სწორკუთხა კოშკებია აღმართული. ციხეში შესასვლელი მოწყობილია სამხრეთის კოშკის პირველ სართულზე. ეს კოშკი XIX საუკუნეში საცხოვრებლად გამოუყენებიათ და ამიტომ მეორე და მესამე სართულები ძლიერ სახეშეცვლილია. კოშკის პირველ სართულს კამაროვანი გადახურვა აქვს, ზედა სართულებს კი _ კოჭოვანი. სამხრეთის ხაზზე სამი კოშკი გამოდიოდა, მათ შორის მანძილები ისე იყო გამოთვლილი, რომ ციხის გარეთ ე.წ. მკვდარი წერტილები არ რჩებოდა. ასეთ შემთხვევაში მანამ დამცველებს ტყვია წამალი არ გამოელეოდათ, გალავანთან მტერი ვერ მიდიოდა.

მეორე პირამიდული კოშკი, რომელიც დასავლეთის კედლის შუაში დგას, ძირითადად ზემოთაღწერილის მსგავსია. ციხის კუთხეებში აღმართული ცილინდრული კოშკებიდან ყველაზე უკეთაა მოღწეული სამხრეთ-აღმოსავლეთისა. პირველ და მეორე სართულებს ცალ-ცალკე ჰქონდა შესასვლელი ეზოდან. პირველი სართულის კედლები ყრუა, იგი დამხმარე იქნებოდა. მეოთხე სართულის კედლების შერჩენილ ქვედა ნაწილებში განლაგებულია ექვსი სალოდე. ციხის გალავანი ორიარუსიანია და საკმაოდ მაღალიცაა. 

ციხეს აღმოსავლეთის კედლის შუა ერთი სათადარიგო კარი ჰქონია ისრული თაღით გადახურული. ციხის შესახებ მემატიანე არაფერს გვიყვება. გადმოცემით კი ციხე ვახვახიშვილებს ეკუთვნოდათ და როგორც ქართლ-კახეთის ყველა ციხე-გალავანი, ესეც აგებულია XVIII საუკუნის შუა ხანებიდან ბოლომდე.  

პ.ზაქარაია “საქართველოს ძველი ციხე-სიმაგრეები” გამომცემლობა “საბჭოთა საქართველო” 1988წ. Gვ.154-156