ბაწარა-ბაბანეურის სახელმწიფო ნაკრძალი

ბაწარა-ბაბანეურის დაცული ტერიტორიები მდებარეობს კახეთში, ახმეტის მუნიციპალიტეტის ტერიტორიაზე. იგი შეიქმნა 2003 წელს და მოიცვა ბაწარისა და ბაბანეურის ნაკრძალებს და ილტოს აღკვეთილს

ბაწარის სახელმწიფო ნაკრძალი პირველად შეიქმნა 1935 წელს. ბაწარას ნაკრძალი მდებარეობს პანკისის ხეობაში, კერძოდ, მდინარე ალაზნის მარჯვენა შენაკადის მდინარე ბაწარას ხეობაში. ნაკრძალი ზღვის დონიდან 700- 2,000 მეტრზე მდებარეობს. მდინარე ბაწარას ხეობის შუა ნაწილში შემორჩენილია მესამეული პერიოდის დენდროფლორის რელიქტის, უთხოვრის ტყის თითქმის 270 ჰექტრიანი კორომები. უთხოვრის ასეთი დიდი კორომები მსოფლიოში არსად მოიპოვება.

ბაბანეურის ნაკრძალი შედარებით გვიან, 1961 წელს დაარსდა. ნაკრძალი ახმეტის მუნიციპალიტეტის აღმოსავლეთ ნაწილშია. ნაკრძალი განლაგებულია აღმოსავლეთ კავკასიონის მთისწინეთზე, სოფლების ქვემო ალვანის, ბაბანეურისა და ლალისყურის სიახლოვეს. ტერიტორია ზღვის დონიდან 380 მ-დან 1,100 მ-მდე მერყეობს. მისი შექმნის მიზანი იყო აქ გავრცელებული ძელქვის თითქმის 240 ჰექტრიანი კორომების დაცვა, რომელიც საქართველოს „წითელ ნუსხაშია“ შეტანილი.

ილტოს აღკვეთილი მოიცავს მდინარე ილტოს ხეობის სათავე ნაწილს, რომელიც ვრცელდება ზ.დ. 900-2000 მეტრამდე. ის აღმოსავლეთით ესაზღვრება ბაწარის ნაკრძალს. მისი დაარსების მიზანია ილტოს ხეობაში არსებული ტყის ძვირფასი ჯიშების და ამ ტყეებისთვის დამახასიათებელი ფაუნის დაცვა და აღდგენა. მტაცებელ ფრინველთაგან აქ კაკაჩა, ქორი, მიმინო, ორბი და იშვიათად ბატკანძერაც გვხვდება. ძუძუმწოვრებიდან გავრცელებულია ზღარბი, კვერნა, კურდღელი, მაჩვი, ტურა, მელა, მგელი, გარეული ღორი, დათვი, შველი, ფოცხვერი და არჩვი. ძალზე იშვიათია წავი.

ბაწარისა და ბაბანეურის ნაკრძალში შესვლა ნებადართულია საგანმანათლებლო, არამანიპულაციური სამეცნიერო კვლევისა და მონიტორინგის მიზნით.

ილტოს აღკვეთილში შესაძლებელია შესაძლებელია ბოტანიკური, შემეცნებითი და სათავგადასავლო ეკოტურების მოწყობა.

როგორ მოვხვდეთ დაცულ ტერიტორიაზე?

დღეისათვის ბაწარა-ბაბანეურის დაცულ ტერიტორიებს არ გააჩნია კეეთილმოწყობილი ვიზიტორთა ცენტრი, თუმცა ფუნქციონირებს ადმინისტრაცია, რომელიც მდებარეობს ქ. ახმეტაში ჭავჭავაძის ქ. N105.

მანძილი:

ქ. თბილისიდან ქ. ახმეტამდე, გურჯაანის გავლით, 180 კმ; გომბორის გავლით - 130 კმ. გასათვალისწინებელია, რომ გომბორის გზა ზამთარში იკეტება დიდთოვლობის გამო .

მგზავრობა საზოგადოებრივი ტრანსპორტით:

ორთაჭალისა და ნავთლუღის ავტოსადგურიდან ქ. ახმეტის მიმართულებით მიკროავტობუსი გადის ყოველდღე (6 ლარი, 2 სთ);
მეტრო ისანის მიმდებარე ტერიტორიიდან ქ. ახმეტის მიმართულებით გადის კერძო ტაქსი, ყოველდღე (10 ლარი, 1სთ და 30 წთ);
ქ. ახმეტიდან ბაწარის ნაკრძალი დაშორებულია 25 კმ-ით. გადაადგილება შესაძლებელია მიკროავტობუსით ან კერძო ტაქსით (მიკროავტობუსი- 2 ლარი, კერძო ტაქსი - 15-20 ლარი, 30 წთ);
ქ. ახმეტიდან ბაბანეურის ნაკრძალი დაშორებულია 20 კმ-ით. გადაადგილება შესაძლებელია მიკროავტობუსით ან კერძო ტაქსით (მიკროავტობუსი - 1.5ლარი, კერძო ტაქსი - 10-15 ლარი, 30 წთ);
ქ. თელავიდან მიკროავტობუსი ალავერდის გავლით მიდის პირდაპირ სოფელ ბაბანეურში (2 ლარი, 45 წთ);
ქ. ახმეტიდან ილტოს აღკვეთილი დაშორებულია 40 კმ-ით. გადაადგილება შესაძლებელია მხოლოდ მაღალი გამავლობის ტრანსპორტით. ტრანსპორტის დასაქირავებლად შეგიძლიათ მიმართოთ დაცული ტერიტორიბის ადმინისტრაციას.

საკონტაქტო პირი:

ნატა ჯაფარიძე, ეკოტურიზმის სპეციალისტი, ცენტრალური ოფისი
ტელ.: 577 90 72 72, ელ-ფოსტა: info@apa.gov.ge

ფოტო გალერეა